15 март куни UzEX Tender порталида Андижон вилояти кўп тармоқли тиббиёт маркази томонидан ўз бўлимларининг капитал таъмирини амалга ошириш бўйича ўтказилган тендер натижалари эълон қилинди.
Тендерда фақат «ODIL-XAMZA» ХК ҳамда «ZAMONAVIY QURILISH PLITKALARI» МЧЖ қатнашган. Баённомага кўра, тендерда ғолибликни «ODIL-XAMZA» хусусий корхонаси қўлга киритган. Тендер савдоларида «ODIL-XAMZA» ХК 621 млн сўмга баҳоланган ишлар учун ўз хизматини арзонроқ қилиб, яъни 619 млн сўмга баҳолаган.
«Газета.uz» очиқ манбалар асосида тўплаган маълумотларига кўра, ушбу корхоналар бир-бири билан аффилланган бўлиши мумкин.
КТЯДР маълумотларига кўра, корхона таъсисчиси Ходжаев Одилжон ХХХ, раҳбари эса Ходжаев Хабибулло Одилович ҳисобланади. Асосий фаолият тури — яшаш учун мўлжалланмаган уйлар қуриш.
Ўз навбатида, унинг тендердаги ягона рақиби «ZAMONAVIY QURILISH PLITKALARI» МЧЖ лойиҳа қийматини деярли ўзгартиришсиз қолдирган. КТЯДР маълумотларига кўра, жамият таъсисчиси Акбаров Ботиржон Раҳматжонович, раҳбари эса Ходжаев Абдулхошим Фатидин ўғли ҳисобланади.
Мазкур икки компаниянинг бир-бирига бевосита алоқадор бўлиши мумкинлигини қуйидаги инфографикада кўриш мумкин.
Тендерда қатнашган икки фирманинг бир-бири билан боғлиқлиги. Stat.uz сайтида мавжуд маълумотлар асосида тузилди.
Ходжаев Хабибулло Одилович раҳбарлик қилувчи «ODIL-XAMZA» ХКнинг таъсисчиси Ходжаев Одилжон (отасининг исми номаълум) ҳисобланади. «ODIL-XAMZA» ХК Андижон шаҳри, Саноат кўчаси, 285-уйда жойлашган, худди шу кўчанинг 284-уйида Ходжаев Одилжоннинг ўғли эканлиги тахмин қилинаётган Ходжаев Фатидин Одилжоновичга тегишли бўлган «IDEAL GARANT INDUSTRIYA» МЧЖ жойлашган.
Ўз навбатида, Ходжаев Фатидин Одилжонович Андижон шаҳри, Махтумқули кўчаси, 11-уйда жойлашган «ELEGANT QURILISH BIZNES»га ҳам эгалик қилади. Айнан шу манзилда унинг ўғли эканлиги тахмин қилинаётган Ходжаев Абдулхошим Фатидин ўғлига тегишли «GREAT CONSTRUCTION AND» ҳам жойлашган.
Юқорида айтилгандек, тендерда фақат икки корҳона: Ходжаев Одилжонга тегишли «ODIL-XAMZA» ХК ва Ходжаев Фатидин Одилжоновичга тегишли «ZAMONAVIY QURILISH PLITKALARI» МЧЖлар қатнашган.
«Давлат харидлари тўғрисида»ги Қонуннинг 26-моддасига кўра, иштирокчи ва унинг аффилланган шахси электрон дўкон, аукцион, энг яхши таклифларни танлаш ва тендер бўйича айни битта лотда иштирок этиш ҳуқуқига эга эмас.
Бундан ташқари, протоколга кўра тендерда иккита корхона қатнашган бўлсада, амалда иштирокчилар сони битта бўлган бўлиши мумкин.
Маълумотга кўра, «ZAMONAVIY QURILISH PLITKALARI» МЧЖ ҳозирда фаолият кўрсатаётгани йўқ. Ушбу маълумотни «Газета.uz»га Статистика қўмитаси ходими тасдиқлади. Маълум қилинишича, корхона 2019 йилнинг 28 декабрь кунида ўз фаолиятини тўхтатган. Аммо Солиқ қўмитаси ходими ушбу корхона ўз фаолиятини давом эттираётгани ва Статистика қўмитаси ходимларига маълумотларни қайта текширишни маслаҳат беришини қайд этди.
Мазкур ҳолат юзасидан «Газета.uz» Андижон вилояти кўп тармоқли тиббиёт марказидан изоҳ олишга уринди, аммо ташкилот билан боғланишнинг иложи бўлмади.
