Покистон Ўзбекистонга ҳалол мол гўштининг биринчи партиясини жўнатди, деб ёзди Spot маҳаллий Business Recorder нашрига таяниб.
9 март куни Карачидан тахминан 40 минг долларлик 18 тонна гўшт солинган музлатгич-контейнер жўнаб кетди. Юк Тошкентга келаси ҳафта етиб келиши кутилмоқда. Юк Покистоннинг Shaheen Group ва Pyramid Logistics компаниялари томонидан жўнатилган.
Жўнатиш маросимида Shaheen раҳбари Малик Шер Хон март ойида Ўзбекистонга яна 50 контейнер (жами 900 тонна) гўшт жўнатилишини айтди. Келгуси ойларда гўшт экспорти ортади.
Унинг сўзларига кўра, Покистон Ўзбекистон бозорига яқинда, имтиёзли савдо тўғрисида битимлар тузилганидан сўнг ва товар айирбошлаш ҳажми кўпайганидан сўнг диққат билан қарай бошлаган.
Pyramid Logistics компанияси директори Навид Марват Ўзбекистон бозорининг Покистон гўшти учун катта салоҳияти борлигини қайд этди.
4 март куни икки давлат ўртасида имтиёзли савдо тўғрисидаги ва транзит савдо тўғрисидаги битим имзоланган эди. Президент Шавкат Мирзиёев ва Покистон бош вазири Имрон Хон трансафғон темир йўлини янада ривожлантиришга келишиб олди.
Аввалроқ, Шавкат Мирзиёев Ўзбекистон ҳамда Покистон ҳукуматлари ўртасида транзит савдоси тўғрисидаги битим тасдиқловчи қарорни имзолаганди.
Транспорт йўналишлари ва бозорларини диверсификация қилиш
Ўзбекистон бир неча йилдан буён транспорт йўналишлари ва экспорт бозорларини диверсификация қилиш чораларини кўрмоқда. Президент Шавкат Мирзиёев Мозори Шариф — Кобул — Пешовар темир йўлининг аҳамияти ҳақида бир неча бор гапирган.
Унинг қайд этишича, Ўзбекистон Россия ёки Қозоғистон орқали маҳсулот экспорт қилиши керак эди. Трансафғон темир йўли ишга туширилиши билан Ўзбекистон Покистоннинг Карачи ва Гвадар портларига чиқиш ниятида, қўшни давлатлар эса ўзбек маҳсулотлари транзити учун тарифларни пасайтира олади.
«Агар бу бозорга кира олсак, денгиз портлари орқали бошқа бозорларга ҳам кира оламиз», — деди президент.
Spot нашрининг ёзишича, 2021 йилнинг ноябрида Ўзбекистондан илк транзит юк Покистонга етиб келган. Покистон томони буни «янги ҳамкорлик даврининг бошланиши» деб таърифлаган.
Кўп ўтмай Покистон Ўзбекистондан юк ташувчилар учун божхона тартибларини соддалаштирди. Жумладан, юк машиналари мамлакатга кириш тўлови бўйича гаров пули тўламасдан кириши мумкин. Бу Гвадар, Карачи ва Қосим портлари орқали кирувчи ва чиқувчи юкларнинг транзитини кенгайтиради.
Давлат статистика қўмитаси маълумотларига кўра, январь ойида Покистон Ўзбекистонга озиқ-овқат экспорт қилувчи давлатлар орасида 6,1 млн долларлик (ўсиш 7,5 баробар) маҳсулот экспорт қилган ҳолда 5-ўринни эгаллади. Хусусан, картошка етказиб бериш 23,5 бараварга ошиб, 3,3 млн долларгача, мандарин етказиб бериш эса 5,8 баробарга ўсиб, 2,69 млн долларгача етди.
Ўзбекистонда гўшт билан боғлиқ вазият
Олий Мажлис Сенатининг Бюджет ва иқтисодий ислоҳотлар масалалари қўмитаси раиси Эркин Гадоев 2021 йилнинг кузида аҳолининг чорвачиликка бўлган эҳтиёжини қондириш учун мамлакатда тиббиёт меъёрларга мувофиқ 1,5 млн тонна (бир киши бошига йилига 42,8 килограмм) гўшт зарурлиги ҳақида маълумот берганди. 2021 йилда 1,4 миллион тонна ишлаб чиқариш режалаштирилган эди, бу 2020 йилга нисбатан 4 фоизга кўпдир.
«Бу миқдор аҳоли истеъмоли талабининг 93 фоизига тенг. Демак эҳтиёжнинг қолган қисми импорт гўшт ҳисобидан қопланиши керак», — деган эди у.
2021 йилнинг 11 ойи давомида Ўзбекистон 27,6 минг тонна гўшт импорт қилди, шундан 67 фоизи ёки 18,7 минг тоннаси Беларусь ҳисобига тўғри келди. Қозоғистондан 4200 тоннага яқин , Украинадан — 2600 тонна гўшт импорт қилинган.
Президент қарори билан 2022 йил 31 декабрга қадар беш турдаги товарлар, жумладан, гўшт, сариёғ, ун ва совун импорти учун божхона тўловлари ставкалари нолга туширилди. 30 апрелга қадар гўшт, сариёғ, картошка, чорва моллари ва балиқларни импорт қилишда ҳам ҚҚС ставкаси нолга тенг бўлади.
