9 март куни Тошкентда Ўзбекистон ва Эрон хавфсизлик бўйича қўшма комиссиясининг биринчи йиғилиши бўлиб ўтди. Бу ҳақда президент матбуот хизмати хабар берди.

Шу куни комиссия тузиш тўғрисидаги ҳужжатни Ўзбекистон президенти ҳузуридаги Хавфсизлик кенгаши котиби Виктор Маҳмудов ва Эрон Миллий хавфсизлик олий кенгаши котиби Али Шамхоний имзолади.

Эроннинг Irna ва Mehr News агентликлари мазкур ҳужжат Тошкент ва Теҳрон ўртасида терроризм, экстремизм, наркотик моддалар контрабандаси ва бошқа трансмиллий уюшган жиноятчиликка қарши курашда ҳамкорлик қилиш учун асос бўлиб хизмат қилиши ҳақида хабар берди.

Али Шамхоний минтақада терроризм ва экстремизм тарқалишининг олдини олиш Эрон ва Ўзбекистоннинг хавфсизлик вазифаларидан бири эканини таъкидлади. Унинг сўзларига кўра, Афғонистон билан умумий чегара ушбу мамлакатда муаммоларни ҳал қилиш, тинчлик ва барқарорликни ўрнатиш учун ҳамкорликни кучайтиришни талаб қилади.

9 март куни Али Шамхоний Ўзбекистон президенти Шавкат Мирзиёев томонидан ҳам қабул қилинди. Давлат раҳбари матбуот хизмати мажлисда «Хавфсизлик бўйича қўшма комиссиянинг биринчи йиғилишининг амалий натижалари ижобий баҳолангани»ни маълум қилди.

Томонлар савдо-иқтисодий, транспорт-коммуникасия соҳаларидаги лойиҳалар, минтақавий хавфсизликни таъминлашдаги ҳамкорлик, шунингдек, Афғонистондаги вазият ва ушбу мамлакатдаги гуманитар инқирозни бартараф этишга кўмаклашиш чораларини муҳокама қилди.