Самарқанд вилояти ИИБ ЖҚБ Уюшган жиноятчиликка қарши кураш бўлими ҳамда ДХХ ходимлари ҳамкорлигида Самарқанд шаҳри ва Пастарғом туманларида орадаги келишмовчиликларни «разборка» орқали ҳал қилмоқчи бўлган гуруҳлар қўлга олинди, дея хабар қилди ИИВ матбуот хизмати раҳбари Шоҳруҳ Ғиёсов.

Қайд этилишича, биринчи ҳолатда 4 март соат тахминан 20:30 ларда Самарқанд шаҳар Огаҳий кўчасида бир гуруҳ шахслар ўрталаридаги ўзаро келишмовчиликни жанжал орқали ҳал қилмоқчилиги тўғрисида тезкор маълумот олинган ва ушбу гуруҳларнинг оммавий жанжал қилишининг олди олинган. Ушбу жанжалда икки томондан иштирок этмоқчи бўлган 9 нафар шахсга нисбатан 15 суткалик маъмурий қамоқ жазоси тайинланган.

Иккинчи ҳолатда эса Пастдарғом туманидаги Жума шаҳри ҳамда Арабхона маҳаллаларида яшовчи 15 нафар спортчилар томонидан «Самарқанд-Жума» йўналишдаги автошоҳ бекатни зўравонлик ва ўзбошимчалик билан ноқонуний равишда эгаллаш мақсадида, «разборка» яъни кўча йўли билан ҳал қилиш ҳамда мақсадида йиғилган вақтида қўлга олиниб, уларнинг фаолиятига чек қўйилди. Мазкур гуруҳларга етакчилик қилган ва фаол иштирок этган шахсларга нисбатан ҳам 15 сутка маъмурий қамоқ жазоси тайинланган.

Ҳолат бўйича тезкор суриштирув ишлари олиб борилмоқда.