Келиб чиқиши россиялик бўлган, лекин бир неча йиллардан бери Исроилда яшаб келаётган «Дежурный по Израилю» Telegram канали муаллифи Марк Новиков уруш пайти ахборот маконида янгиликларга қизиқадиганлар ўзини қандай тутиши кераклиги ҳақидаги тавсиялари билан бўлишди. davletovuz Telegram канали унинг тавсияларини ўзбек тилига таржима қилди. Канал муаллифининг розилиги билан, «Газета.uz» ҳам ушбу тавсиялар билан бўлишади.
Рақамли гигиена. Воқеа жойидан юборилаётган роликларни, портлаш ва ҳужумлар, ҳарбий ҳаракатлар видеоларини томоша қилишни йиғиштиринг. Бундай видеоларда ҳеч қанақа маълумот йўқ, шунчаки асабингизни тамом қилгани қолади, холос.
Мабодо жудаям хоҳласангиз ёки касб тақозоси ёхуд бошқа сабаб воқеаларни реал режимда кузатишингиз керак бўлса, ўзингиз ишонадиган матн шаклида ёзадиган муаллифларни кузатинг.
Сизни даҳшатга солган, аммо унда эмоциядан ташқари бошқа ахборот бўлмаган контентни яқинларингизга, дўстларингизга юбориб, уларнинг асабини ҳам бузманг. Сиз учун маъқул кўринган контент бошқаларга салбий таъсир кўрсатиши мумкин.
Интернетда сиёсий қарашларингизга қарама-қарши тараф билан баҳслашишдан тийилинг. Сиз уларни бирор нарсага ишонтиролмайсиз, аммо кўп куч ва асабингиз кетгани, кайфиятингиз бузилгани қолади. Кайфият сизнинг керакли ресурсингиз. Иложи бўлса, улар билан ижтимоий тармоқлардаги алоқаларни тўхтатиш керак.
Агар шароит кўтарса, телефонингизда янгиликлар каналлари ва сайтларнинг билдиришномаларини ўчириб қўйинг, дам олиш кунлари умуман ўзингизни янгиликлардан чекланг, ахборот-детокс эълон қилинг.
Яхшилик қилинг, одамларга ёрдам беринг, ҳар қандай хайрия ёрдами одамга ички хотиржамлик бахш этади, қалбини тинчлантиради, ҳаётга мазмун бағишлайди. Агар муаммога дуч келган одамларга — урушдагилар ёки қочқинларга ёрдам беришнинг иложи бўлмаса, яқин атрофингиздаги ёрдамга муҳтож бўлганларга ёрдам беринг. Ишонинг, бундай одамлар жуда кўп.
Ишлаётганингизда ёки уй ишларини қилаётганда фонда ахборотларни кузатиб бориш яхши эмас. Ҳозир нима қилаётган бўлсангиз, шунга кўпроқ диққатни қаратинг. Чой ичяпсизми — чой ичинг, чалғиманг.
Одамларга раҳмат айтинг ва уларга илтифот кўрсатинг. Шунчаки. Яхшиликка сабаб керак эмас. Ишонинг, бу нафақат ўша одамнинг, балки сизнинг ҳам кайфиятингизни яхшилайди.
Кундалик ҳаётингизни тартибга солинг, кундалик ишларингизни иложи борича, ёзма равишда режалаштириб олинг. Қатъий режада ижтимоий тармоқлар учун маълум вақт ажратинг, шунда ҳар доим лентага қарайвермайсиз.
Ва охиргиси — энг муҳими, оила аъзоларингизга, яқинларингизга кўпроқ вақт ажратинг. Бу жуда муҳим.
