Шавкат Мирзиёев 9 март куни Наманганда қуриладиган «Янги Наманган» шаҳарчасининг иккинчи босқичи лойиҳаси билан танишди, деб хабар берди президент матбуот хизмати.
Шаҳарча лойиҳасининг биринчи босқичида 330 гектар майдонда 8500 хонадонли 184 та уй-жой барпо этилди. Шунингдек, 145 гектар майдонда кичик саноат зоналари ташкил этилиб, 10 минг янги иш ўринлари яратилди.
Бугунги кунда Наманган шаҳрида 30 минг фуқаронинг уй-жойга эҳтиёжи бор. Келгуси йилларда шаҳар аҳолиси йилига 25 минг нафарга кўпайиши кутилмоқда. Шу боис, Шавкат Мирзиёев сайловолди дастурида Наманган шаҳрини «бир миллионлик шаҳар»га айлантириш ва «Янги Наманган» шаҳарчасини кенгайтиришни айтган эди.
Иккинчи босқич лойиҳасига кўра, 272 гектар майдонда 20 минг хонадонга эга 171 та кўп қаватли уй қурилиши режалаштирилган. Давлат раҳбари мутасаддиларга ҳозир кўп қаватли уйларда яшаётган одамлар ва талабгорлар билан учрашиб, уларнинг таклифларини олиш, шу асосида лойиҳани танқидий қайта кўриб чиқиб, батафсил режалаштириш бўйича топшириқ берди.
Фото: «Ўзбекистон24» видеосидан лавҳа.
Лойиҳага кўра, «Янги Наманган» шаҳарчаси лойиҳасини амалга ошириш учун 4 та компания жами 4,4 млн доллар (500 минг, 900 минг, 1,3 млн ва 1,7 млн доллар) таклиф қилган. 94 гектар ерни аукционга қўйиш ортидан эса 128 млрд сўм маблағ олиш кутилмоқда.
«Бундай катта қурилиш Наманган эмас, балки Ўзбекистон тарихида биринчи марта бўляпти. Шунинг учун, яна бир марта танқидий кўриб чиқиб, биринчи навбатда геология, иккинчидан сифат, ичидаги эшиги, ойнаси… бир марта талабгорлар билан учрашув қилса яхши бўларди. Телевизорда чиққанларинг бошқа, одамларга тушунтирганларинг бошқа», — деб раҳбарларга юзланди Шавкат Мирзиёев.
Давлат раҳбари шунингдек, одамлар лойиҳанинг геологияси, қурилиши, цемент ва металлнинг маркаси қандай бўлиши ҳақида савол беришини айтиб, «уларнинг кўнглини ҳотиржам қиладиган ишни амалга ошириш кераклигини» таъкидлади.
Фото: «Ўзбекистон24» видеосидан лавҳа.
Унинг қўшимча қилишича, ҳар бир маҳаллада кутубхона билан ҳаммом, битта савдо мажмуаси, овқатланиш объектлари ва дўконлар қурилиши керак.
Бундан ташқари, биноларнинг 1−2 қавати маҳалла учун ажратилиб, давлат хизматлари кўрсатилади.
Президент у ерда аёллар, ёшлар, тадбиркорларга, маҳаллалардаги профилактика инспекторларига ва суд раислари келадиган зал бўлиши кераклиги ҳақида гапирди. Унинг сўзларига кўра, суд келиб ҳалқ билан учрашиши керак. Атрофда эса спорт мажмуалари бўлиши лозим.
«Маҳалла бу — маданият, тарих, ўзлигимизни англаш дегани. Шуни Намангандан бошлайлик», — деди давлат раҳбари.
Шавкатжон Абдураззоқов. Фото: «Ўзбекистон24» видеосидан лавҳа.
Наманган вилояти ҳокими Шавкатжон Абдураззоқовнинг сўзларига кўра, ҳозирда Наманган шаҳрининг ўзида 30 минг хонадонга эҳтиёж мавжуд. У шунингдек, «Янги Наманган» шаҳарчасида «Янги Ўзбекистон» боғини барпо этиш ишлари ҳам бошлаб юборилганини айтди.
«Ҳурматли президентимиз қуриладиган уйларни биринчи навбатда зилзилага бардошлилиги, иккинчидан миллий, Наманган шароитига мос, сифатли қуриш масаласига алоҳида эътибор бердилар. Аҳолига тақдимот ўтказиб, уларнинг фикрларини олиш бўйича кўрсатма бердилар», — деди ҳоким.
«Янги Ўзбекистон» боғининг лойиҳаси. Фото: «Ўзбекистон24» видеосидан лавҳа.
Аввалроқ, Наманган вилоятида «Янги Ўзбекистон» боғини қурилиши ҳақида ёзгандик. У Тошкент вилоятида барпо қилингани каби Ўзбекистонни янада ривожлантириш бўйича Ҳаракатлар стратегиясини ифодаловчи дарахтнинг бешта шохи кўринишида бунёд этилади.
