Олий Мажлис Қонунчилик палатасининг навбатдаги ялпи мажлисида «Давлат божи тўғрисида»ги Ўзбекистон Республикаси Қонунига ўзгартиш ва қўшимчалар киритиш ҳақида»ги қонун лойиҳаси биринчи ўқишда кўриб чиқилди.
Ҳужжат билан нотариал ҳаракатларни амалга оширганлик учун бир қатор давлат божи миқдорларининг ставкаларини оптималлаштириш кўзда тутиляпти.
Аввалроқ, «Газета.uz» хабар берганидек, лойиҳага мувофиқ, транспорт воситаси двигатели қувватининг от кучи ва ишлаб чиқарилган санасидан қатъий назар, унинг олди-сотди шартномасини нотариал тасдиқлаш нархи БҲМнинг 3 баробари (810 минг сўм) этиб белгиланмоқда. Амалда эса БҲМнинг 2 баробаридан 10 бараваригача (540 минг сўмдан — 2,7 млн сўмгача) миқдорда белгиланган.
Таъкидланишича, таклиф этилаётган ушбу ўзгариш натижасида эндиликда битта автомобиль олди-сотдисини нотариал тасдиқлаш харажатлари ўртача 1 млн сўм атрофида камайишига эришилади. Нархи қиммат автомобилларда эса бундан ҳам кўпроқ тежаб қолинади.
«Бугунги кунда мамлакатимизда бир йил давомида ўртача 400 мингдан ошиқ иккиламчи автомобил олди-сотдилари амалга оширилишини ҳисобга олсак, бу қонун лойиҳасини кучга кириши билан йилига давлат божи тўловларидан тежалган 400 млрд сўм атрофида маблағ фуқароларимиз ёнида қолишини англатади», — деб ёзмоқда Дониёр Ғаниев.
Унинг қўшимча қилишича, бегона шахсга автотранспорт воситасини тассарруф этиш ҳуқуқи билан нотариал ишончнома бериш (халқ тилида «гендоверност») божи ҳам — БҲМнинг 2 баробари (540 минг сўм) этиб камайтирилади.
