Ўзбекистон Олий Мажлиси Қонунчилик палатасининг 9 март куни бўлиб ўтган ялпи мажлисида «Ўзбекистон Республикасининг Жиноят кодексига ўзгартиш ва қўшимчалар киритиш ҳақида»ги қонун лойиҳаси қабул қилинди. Бу ҳақда парламент қуйи палатаси матбуот хизмати хабар берди.

Мажлисда банк пластик карточкалари ва банк ҳисобварақларидан пул маблағларининг ўғирлик йўли билан талон-торож қилиш ҳолатлари ортгани қайд этилди. Хусусан, 2020 йилда шу мазмунда ички ишлар органларига 965 та, 2021 йилда 1601 та мурожаат келиб тушган.

Таъкидланганидек, бугунги кунда банк пластик карточкаларидан пул маблағларини ўғирлик йўли билан талон-торож қилиш ҳолатлари Жиноят кодексининг 169-моддаси (ўғрилик) билан малакаланади.

«Эътиборли жиҳати, кўп ҳолларда фуқароларнинг банк пластик карточкаларидан оз миқдорда талон-торож қилинаётгани сабабли ушбу қилмиш Жиноят кодекси 169-моддасининг 1-қисми билан айб эълон қилинади. Бу ўз навбатида, айбдор шахсларга нисбатан етарлича жазо чораларининг қўлланилмаётганига, уларнинг ахлоқан тузалиш йўлига ўтмаётганига, такроран жиноий фаолият билан шуғулланишига олиб келмоқда», — дейилади хабарда.

Шу жиҳатдан, бу каби қилмишлар учун Жиноят кодексининг 168 ва 169-моддаларини оғирлаштирувчи ҳолат сифатида жавобгарликни белгиловчи норма билан тўлдириш таклиф қилинган.

«Қонун лойиҳасининг қабул қилиниши келгусида жисмоний ва юридик шахсларнинг электрон пул маблағларини яширин равишда талон-торож қилиш, фуқароларнинг ишончига кириб унинг ҳисоб рақами ёки пластик картасидаги пул маблағларини ўғирлаш ҳолатларининг олдини олишга хизмат қилади», — дейилади хабарда.