Вазирлар Маҳкамасининг қарори билан Авазжон Каримов Спортни ривожлантириш вазирининг маслаҳатчиси лавозимига тайинланди, дея хабар бермоқда Спортни ривожлантириш вазирлиги.
Бунга қадар у яқинда иккига ажратилган туризм ва спорт вазирлиги раҳбарига ўринбосарлик қилган, 3 февралдан эса мазкур лавозимдан ҳам озод қилинган.
Қайд этилишича, мазкур қарор билан спортни ривожлантириш вазирининг маслаҳатчиси мақоми меҳнатга ҳақ тўлаш, тиббий ва транспорт хизмати кўрсатиш шарт-шароитларига кўра вазирнинг ўринбосарига тенглаштирилган.
Авазжон Каримов (1983 й. т.) — Тошкент давлат иқтисодиёт университети ва Ўзбекистон давлат жисмоний тарбия институтини тамомлаган.
Меҳнат фаолиятини 2006 йилда Ўзбекистон каратэ федерацияси раиси ўринбосари сифатида бошлаган. 2007−2011 йилларда федерациянинг Тошкент шаҳар бўлимига раҳбарлик қилган, 2011 йилдан Бадминтон федерацияси раиси ўринбосари лавозимида ишлаб келган.
2014−2015 йилларда қишки ва мураккаб техник спорт турлари бўйича Республика олий спорт маҳорати мактаби директори ўринбосари, сўнгра от спорти бўйича РОСММга раҳбарлик қилган.
2017−2019 йилларда Чирчиқ ихтисослаштирилган олимпия захиралари мактаб-интернати директори лавозимида ишлаган. 2019 йил сентябрь ойидан бошлаб Республика олимпия захиралари коллежини бошқарган. Ундан сўнг, 2020 йилнинг 12 октябрида Авазжон Каримов жисмоний тарбия ва спорт вазири ўринбосари этиб тайинланганди.
Аввалроқ, президент қарори билан Абдулло Аслонов, Шахрилло Махмудов ва Мурад Исмаилов спортни ривожлантириш вазирининг ўринбосарлари этиб тайинланганди.
Эслатиб ўтамиз, 18 февраль куни Туризм ва спорт вазирлиги иккига бўлиниб, Туризм ва маданий мерос ҳамда Спортни ривожлантириш вазирликлари ташкил этилганди. Спортни ривожлантириш вазирлигига Савдо-саноат палатаси раиси Адҳам Икрамов раҳбар этиб тайинланди.
Бунгача 2021 йилнинг апрель ойида Жисмоний тарбия ва спорт вазирлиги ҳамда Туризмни ривожлантириш давлат қўмитаси негизида Туризм ва спорт вазирлиги ташкил қилинган эди.
