1 март куни Тошкент шаҳар ҳокими Жаҳонгир Ортиқхўжаев Туркиянинг Ўзбекистондаги фавқулодда ва мухтор Элчиси Олган Бекар билан учрашди, дея хабар берди ҳокимлик матбуот хизмати.


Фото: Тошкент шаҳар матбуот хизмати

Олган Бекар Тошкент шаҳар ҳокимига қабул учун миннатдорлик билдириб, ўзбек-турк муносабатлари жадал ривожланаётганини таъкидлади.

Маълумотда таъкидланишича, март ойининг охирида бўлиб ўтадиган II стратегик ҳамкорлик бўйича саммит доирасида Туркия президенти Режеп Таййиб Эрдўғон Ўзбекистонга ташриф буюриши кутилмоқда.

Шу билан бирга, тарафлар Турк мактабини кенгайтириш учун ер майдонини ажратиш, Туркиянинг биринчи президенти Мустафо Камол Отатурк номини Тошкент кўчаларидан бирига бериш ва Тошкентда қурилиш билан шуғулланаётган турк компанияларининг масалаларини муҳокама этди.

Жаҳонгир Ортиқхўжаев ушбу масалаларнинг ечимида имкон қадар кўмак беришга тайёрлигини билдирган. «Олган Бекар ҳам, ўз навбатида, ҳамкорлик алоқаларини ривожлантириш учун бор имкониятларни ишга солишни ваъда берди», — дейилади маълумотда.

Эслатиб ўтамиз, Тошкентда Мустафо Камол Отатурк кўчаси аввал ҳам бўлган. Миробод ва Юнусобод туманларида жойлашган Мустафо Камол Отатурк кўчаси 2011 йилда Зарафшонга — кўчадаги туташ ҳудудда жойлашган савдо-кўнгилочар мажмуаси номи билан ўзгартилганди.