Россиялик миллиардер Алишер Усмоновнинг USM холдинги «Капиталбанк» (Ўзбекистон) АКБнинг 61,54 фоизлик акцияларига эгалик қилаётган «Телекоминвест» (Россия) ва FINANCE TCI (Ўзбекистон) компанияларининг 100 фоизлик устав капиталини сотиш бўйича келишувни имзолади. Бу ҳақда «Капиталбанк» матбуот хизмати хабар қилди.

Келишув «Капиталбанк» бизнесини биргаликда ривожлантиришдан манфаатдор хусусий инвесторлар гуруҳи ташаббуси билан бўлиб ўтди, дейилади хабарда.

Келишувнинг тижорий шартлари ошкор қилинганича йўқ.

Эслатиб ўтамиз, февраль ойи бошида Алишер Усмоновнинг USM холдингининг шўъба корхонаси бўлган «Телекоминвест» билан афилланган Finance TCI компанияси «Капиталбанк»нинг 12,18 фоиз акциялари эгасига айланганди. Ушбу компаниялар биргаликда банкнинг умумий 61,54 фоиз акцияларига эгалик қилишни бошлаганди.

Аввалроқ АҚШ ва Европа Иттифоқи 24 февраль куни Россия қўшинлари Украина ҳудудига бостириб киргани муносабати билан бир гуруҳ россиялик олигархлар ва сиёсатчилар, уларнинг оила аъзоларига санкциялар жорий этиб, уларнинг активлари музлатилишини маълум қилди.