4 март куни чет эл, жумладан, Ўзбекистон фуқаролари бўлиб турган Украина-Польша чегарасидаги «Карчова» назорат-ўтказиш пункти яқинидаги тўпланиш нуқтасига Польша Президенти Анжей Дуда ташриф буюрди. Бу ҳақда Ўзбекистон ТИВ расмий вакили Юсуп Кабулжанов маълум қилди.
Хабарда қайд этилишича, Анжей Дуда биринчи навбатда Ўзбекистоннинг Польшадаги элчихонаси дипломатлари ёнига келиб, уларнинг қўлини сиқди.
«Сиз юртингиз фуқаролари учун муҳим ва эзгу ишни қиляпсиз. Сизнинг ҳаракатларингизни кўриб бошқа давлатлар дипломатлари ва кўнгиллилар фаолиятингиздан илҳом олиши шубҳасиз. Менга Ўзбекистон ҳукумати ўз фуқароларини эвакуация қилишни биринчи бўлиб бошлагани ҳақида айтиб беришди ва бу саъй-ҳаракатларингизни Ўзбекистон ҳукуматининг ўз фуқароларига нисбатан муҳим эътибори ва оталарча ғамхўрлиги деб биламан», — дея унинг сўзидан иқтибос келтирди ТИВ вакили.
«Ҳеч қанча вақт илгари биз ҳам худди шундай вазиятга тушиб қолгандик ва сизга қўшни бўлган давлатни тарк этган фуқароларимиз ҳамда Европа мамлакатларининг фуқароларидан хавотирда эдик. Биз уларни эвакуация қилишдек бу оғир операцияни фақат Ўзбекистоннинг фаол кўмаги билан амалга ошира олдик. Бу бизнинг ёдимизда», — деди Анжей Дуда.
Анжей Дуда Ўзбекистон фуқаролари билан ҳам суҳбатлашиб, уларни қўллаб-қувватлаши ва зарур ёрдам кўрсатишини айтиб ўтди, деди Юсуп Кабулжанов.
Аввалроқ 4 март куни тушга қадар 11 та авиарейс билан Польша орқали Украинадан 2579 киши эвакуация қилинганини ёзган эдик. Эвакуация давом этмоқда.
