2 март куни Uzbekistan Airways авиакомпаниясининг учта самолёти билан 671 нафар Ўзбекистон фуқароси Польшанинг Катовице аэропорти орқали Украинадан эвакуация қилинди, дея хабар қилди ТИВ расмий вакили Юсуп Кабулжанов. Улар орасида 129 аёллар, 82 болалар ва 14 чақалоқлар бор.

ТИВ вакилининг маълум қилишича, умумий ҳисобда Украинадан Польша ҳудуди орқали саккизта авиарейс билан 1859 нафар ўзбекистонлик олиб келинган. Бугун яна бир неча эвакуация қатновини ташкил этиш режалаштирилган.

Айни пайтда Польша ҳудудида 1100 дан ортиқ фуқаро қолмоқда. Улардан 550 нафари Польша давлат чегарасидаги тўпланиш нуқтасига, 550 нафари эса Катовице аэропортига жойлаштирилган.

«Ўзбекистон Республикасининг Украинадаги Элчихонаси томонидан жанговар ҳаракатлар кетаётганига қарамай, мамлакатимиз фуқароларини эвакуация қилиш ишлари давом эттирилмоқда», — деб ёзди Юсуп Кабулжанов.

Ўзбекистоннинг Польша ва Украинадаги дипломатик ваколатхоналари узлуксиз тартибда ишлаётгани, фуқаролар учун иссиқ овқат етказилиб, зарур ҳолларда тиббий хизматлар кўрсатилаётгани маълум қилинди.