Англиянинг «Челси» клуби эгаси бўлган тадбиркор Роман Абрамович Лондон жамоасини сотувга қўйгани маълум бўлди. Бу ҳақда клубнинг матбуот хизмати томонидан эълон қилинган Абрамович баёнотида маълум бўлди.
«Мен сўнгги бир неча кун ичида ОАВда тарқалган «Челси»га эгалик қилишим ҳақидаги миш-мишларга тўхталиб ўтмоқчиман. Аввал айтиб ўтганимдек, мен ҳар доим клуб манфаатини кўзлаб қарор қабул қилганман. Ҳозирги вазиятда мен клубни сотишга қарор қилдим. Бу клуб, мухлислар, ходимлар, шунингдек, ҳомийлар ва ҳамкорларнинг манфаатларига мос келади деб ўйлайман», — дейилади баёнотда.
Роман Абрамович клубнинг сотилиш жараёни тезда кечмаслигини ва белгиланган тартибда ўтишини таъкидлаган. Шунингдек, у «Челси»нинг 1,51 миллиард фунт стерлинглик қарзини кечиб ҳам юборишини айтган.
Абрамович ўз жамоасига хайрия жамғармасини ташкил этишни буюрганини маълум қилди.
«У ерда савдодан тушган барча соф даромадлар хайрия қилинади. Жамғарма Украинадаги урушнинг барча қурбонларига ёрдам бериш учун ташкил қилинади. Бу жабрланганларнинг шошилинч ва тезкор эҳтиёжлари учун муҳим маблағларни тақдим этишни, шунингдек, узоқ муддатли тикланиш ишларини қўллаб-қувватлашни ўз ичига олади», — дейилади клуб хабарида.
«Шуни билингки, бу қарорни қабул қилиш ниҳоятда қийин бўлди ва клубдан шу тарзда ажралиш мен учун оғриқли. Бироқ, мен бу клубнинг манфаатига фойда келтришига ишонаман», — деган «Челси» эгаси.
Sports.ru нашри хабар беришича, россиялик тадбиркор «Челси»ни 2 млрддан 4 млрд фунт стерлинггача сотиши мумкин. Ҳозирча клубни сотиб олиш учун энг катта даъвогар швейцариялик миллиардер Хансйорг Висс бўлиб турибди. Лекин у Абрамович клуб учун катта маблағ сўраётганлигини таъкидлаган. Висс Америка консорциуми билан биргаликда клубни харид қилиши мумкинлиги айтилмоқда.
Абрамович «Челси» футбол клубини 2003 йилда 140 миллион фунтга сотиб олган ва клубга 1,5 миллиард фунт стерлингдан ортиқ сармоя киритган.
Бу вақт ичида «Челси» Англиянинг тўрт карра чемпиони, икки марта Чемпионлар Лигаси ва Европа Лигаси ғолиби бўлди. Шунингдек, беш марта Англия кубоги, уч марта Лига кубоги ва икки марта Англия Суперкубогини қўлга киритди.
2021 йилнинг август ойида УЭФА Суперкубогини ҳам қўлга киритган «Челси» Абрамович ҳомийлигида барча мумкин бўлган йирик футбол совринларини қўлга киритишга муваффақ бўлди, дейиш мумкин.
