Ўзбекистонда 2021 йил август ойидан буён коронавирусга қарши эмлашдан бош тортган 45,6 минг ходим ишдан четлаштирилган. Бу ҳақда Республика махсус комиссиясининг 23 февраль куни бўлиб ўтган йиғилишида Санитария-эпидемиологик осойишталик ва жамоат саломатлиги хизмати раҳбари Баҳодир Юсупалиев маълум қилди.
Август ойи бошида Меҳнат кодексига ходим эмлашдан ўтишни рад этган ҳолда иш берувчи уни ишдан четлатишга ҳақли деган меъёр киритилганди.
СЭС раҳбарининг маълум қилишича, ўтган вақт мобайнида 28,5 минг тадбиркорлик субъекти ва 44,6 мингдан ортиқ бюджет ташкилотида текширув ўтказилган.
Текширувлар натижаларига кўра, 89,4 мингга яқин вакцина олмаган ишчилар аниқланган, улардан 45,6 минг нафари вақтинча ишдан четлаштирилган. 4600 та ҳолатда иш берувчилар жаримага тортилган, 246 та объектга нисбатан фаолиятини вақтинчалик тўхтатиш чораси кўрилган.
Махсус комиссия иш берувчилар коронавирусга қарши вакцина ва бустер доза олган ишчилари қамровини камида 90 фоизга етказиши кераклигини белгилади. Вакцина ва бустер доза олмаган ходимлар вақтинчалик ишдан четлаштирилади.
Эслатиб ўтамиз, аввалроқ ушбу йиғилишда мажбурий ниқоб тақиш режими ва коронавирусга қарши бошқа чекловларни бекор қилиш тўғрисида қарор қабул қилингани ҳақида ёзган эдик.
