Икки сутка ичида дунёнинг асосий криптовалютаси нархи 6500 долларга кўтарилди. 2 март куни соат 09:55 ҳолатига 1 BTC 44 389 долларни қайд этди.
Охирги марта Bitcoin бу кўрсаткични Украинада харбий операция бошланишидан бир ҳафта олдин, 16 февраль куни қайд этган эди. 28 февраль куни соат 09:59 ҳолатига 1 BTC 37 812 долларни ташкил этган.
Bitcoin билан бирга, бошқа криптовалюталар ҳам ўсиб бормоқда. Мисол учун, Ethereum бир суткада 3,5%, BNB 4,9% ва Terra криптовалюталари 6,8% га ўсди.Топ -10 криптовалюталар ичида фақатгина 3 поғонада жойлашган Tether криптовалютаси нархида 7 кун ичида бироз пасайиш кузатилди.
Dogecoin ҳам кун давомида бир оз ошди (1,41%), лекин шу билан бирга, Илон Маскнинг севимли криптовалютаси бўлган Dogecoin ўз позициясини йўқотишни давом этмоқда: у дунё криптовалюталарининг топ-20 лиги рўйхатида 13-ўринга тушиб кетди. 2021 йилнинг май ойида Dogecoin ушбу рейтингнинг 4-поғонасидан жой олган эди.
