22:00 да Тошкент халқаро аэропортининг кутиб олувчилар учун мўлжалланган зонасида одамлар тўпланишни бошлади. Ўзини Ольга Алексеевна деб таништирган аёлнинг айтишича, Boeing 767−300 бортида қизи келяпти.
«Қизимнинг исми ноёб исмлардан. Таниб қолишмасликлари учун айтиб ўтирмайман, — дейди Ольга Алексеевна. — Аня бўлақолсин».
Аня Львов шаҳрида беш йилдан кўп яшади. Онасининг айтишича, у камёб касб эгаси. Ольга Алексеевна қизининг касбини ҳам айтишни истамади. Аёлнинг сўзларига кўра, Тошкентда бу касб бўйича иш топиш мураккаб бўлгани учун, Анянинг Львовда ишлари юришиб турган экан, ўша ерда яшай қолсин, деган тўхтамга келишган.
Аммо февраль охиридаги тўрт кунда юз берган ҳодисалар Аняни ортга қайтишга мажбур қилди.
«25 саналарга бориб, нотинчликлар шаҳаргача етиб бориши мумкинлиги ҳақида гап-сўзлар тарқала бошлаган. Шу пайтгача ҳаммаси тинч бўлган, шунчаки одамларнинг ўзлари турли хабарлар билан ҳаммаёқни алғов-далғов қилмоқда. Шунда мен унга элчихонага мурожаат қилиб, ортга қайтишини айтдим», — дея ҳикоя қилади Ольга Алексеевна.
Аёл суҳбат давомида сўзларни, худдики, «осколка» сингари, ўта эҳтиётлик билан танлайди. Эвакуация ҳақидаги қарорнинг қабул қилиниши қўрқув сабабли бўлмаган, дея таъкидлайди. Шунчаки вазиятнинг ўзи босим ўтказган, чунки «атрофдаги одамлар иккиланиб қолишган, тўғри ахборот олишолмаган».
«Бир томондан хотиржамликни сақлаш кераклиги айтилса, иккинчи томондан „огоҳ бўлинг, кўчага чиқмасликка ҳаракат қилинг“, дейилган. Бу руҳан таъсир қилади», — дея тушунтиради Ольга Алексеевна.
Шундан сўнг, «ўзингиз тушунасизку» дея, бошқа ҳеч нарса айтолмаслигини қўшимча қилади.
23:06 да «Катовице-Тошкент» рейсининг биринчи йўловчилари учиб келиш залида пайдо бўла бошлади. Энг четдаги паспорт назорати пунктида катта тезликда узун навбат ҳосил бўлди. Одамлар бир жойда тўпланиб қолмасликлари ҳамда жараённи тезлаштириш мақсадида, шу пайтнинг ўзида яна бир нечта пунктлар ишга туширилади.
Транспорт вазирлиги матбуот котиби Наврўз Ашурматовнинг сўзларига кўра, Ўзбекистонга Украинадан Польша орқали 251 киши қайтган. Уларнинг 37 нафари болалар ва 10 нафари гўдаклардир.
«Навбатдаги „Катовице-Тошкент“ рейси 1 мартга режалаштирилган. Йўловчиларнинг тахминий сони ҳозирча 200 нафардан ошган. Эвакуация рейсларининг барчаси давлат ҳисобидан амалга оширилади», — дея таъкидлади Наврўз Ашурматов.
Учиб келиш залида багажлар учун мўлжалланган каруселлар оралиғида сув ва қоғозли стаканлар қўйилган стол пайдо бўлади. Стол ортида аэропорт ходимаси катталар ва болаларни юзида табассум билан қарши олади ва парвоз қандай ўтгани ҳақида қизиқади.
Бортда учиб келган аёллардан бири ўзига камерасини тўғрилаган журналистлардан қочади. Эгнига рюкзак ортиб олган, қўлида махсус идишда сариқ мушугини кўтариб бораётган бу аёлнинг овози чарчоқдан зўрға чиқади: «Илтимос, мен тўрт кун ухламаганман».
Биринчи эвакуация рейсининг йўловчиларидан бири бўлган Жамол Сулейманов йўл жуда ҳам толиқтирганини тан олади. У аввалига Львовдан Украина-Польша чегарасидаги «Корчова» ўтказиш пунктигача боришганини, сўнгра «Катовице» аэропортидан Тошкентга келишганини айтади.
Унинг айтишича, йўлнинг энг мураккаб босқичи бу чегарадан ўтиш бўлган.
«Кечаси совуқ эди.Деярли бир кунни тик оёқда ўтказдик, чунки Польша чегарачилари бизни ўтказмади. Биринчи бўлиб аёллар ва болалар ўтди», — дея ҳикоя қилади Жамол Сулейманов.
У Бухородан. Украинага иш билан борган — тажриба алмашгани. Саккиз ой давомида Львов маркази ҳисобланган Сатрицкий туманида яшаган. Айтишича, вақтинча яшашга рухсатнома ололмагани учун Ўзбекистонга қайтишни режалаштирган. Сиреналар овози эса ушбу қарор қабул қилинишини тезлаштирган.
«Львовда ҳарбий ҳаракатлар йўқ эди. Фақат сиреналар ишлаб турди, одамлар ким уйида, ким паноҳгоҳларда яширинди. Ҳамма асабий, нарсаларни йиғган тайёр ҳолат эди. Курткаларда, чемоданларда», — дея ҳикоя қилади ёш йигит.
Львовда рўй бераётган воқеалар ҳақида эса шаҳарда қолган дўстларидан маълумотлар олиб турганини айтади. У фейк маълумотларга дуч келмаслик эҳтимолини фақат шу йўл билан пасайтириш мумкинлигини айтади. Жамол, ҳаммаси тугагач, тезроқ Украинага қайтишни исташини тан олади. Энг аввало ўша ерда танишган ва дўстлашган инсонлар ёнига қайтишни хоҳлашини айтади.
Багаж карусели ёнида бир эркак турибди, кўзлари билан тинмай кимнидир қидиради. Айтишича, акаси Жавлон Киевдан Олмалиққа қайтишни режалаштирган.
«У бир ярим йилдан буён ўша ёқда. Лаваш тайёрлайдиган жойла ошпаз бўлиб ишлаган», — дея ҳикоя қилади ўзини Жаҳонгир деб таништирган эркак.
Уч кун олдин акаси қўнғироқ қилган. Вазият ностабиллигини ва уйга қайтмоқчи эканлигини айтган. Йўлга чиққанми-йўқ ёки қайси рейс билан чиққанлигини айтмаган.
1 март куни маҳаллий вақт билан в 09:15 Uzbekistan Airways томонидан Украинадан эвакуация қилинган бортида 258 нафар фуқаро бўлган иккинчи махсус рейс Тошкентга етиб келди. Ватанга жами 509 ватандошлар қайтарилган. «Корчова» назорат ўтказиш пунктидаги тўпланиш зонасида яна 650дан ортиқ фуқаролар қолмоқда, улар учун барча шароитлар яратилган. Уларнинг эвакуацияси учун қўшимча махсус бортлар йўлга қўйилиши режалаштирилмоқда. Рейслар сони Ўзбекистонга қайтишга қарор қилган фуқаролар сонига боғлиқ бўлади. Ватандошлар эвакуациясини Ўзбекистон Ташқи ишлар вазирлиги мувофиқлаштириб бормоқда.
