Ижтимоий тармоқларда Тошкент шаҳрининг Учтепа туманида жойлашган 283-сонли мактаб ўқувчиларига қизил галстук тақдирилганлиги ҳолати «пионерликка қайтиш» дея тарифлангани муҳокамаларга сабаб бўлмоқда.

Мазкур ҳолатга Халқ таълими вазирлиги матбуот котиби Лайло Рустамова муносабат билдирди.

Таъкидланишича, мактаб маъмурияти мактабнинг 28 февралдаги очилиш маросимига ота-оналар билан келишилган ҳолда «бошланғич синфларга эркаклар галстукининг қизил рангини, катта синфларга кўк рангини тақиш» танлаган.

Қолган кунлари мактаб галстук тақишни талаб қилмаган, оқ кўйлак, тўқ кўк шимда келиши зарурлиги айтилган.

«Мазкур масалага сиёсий тус бермасликни сўраймиз», — дейилади хабарда.

283-сонли мактабнинг 540 ўринли биноси 26 февраль куни фойдаланишга топширилганди.

Маълумот ўрнида, пионерлик ҳаракати — турли мамлакатларда болалар коммунистик ташкилотининг жамоавий номи ҳисобланади. У илк бор 1922 йилда СССРда тузилган. Унинг асосий белгисини пионерлик бўйинбоғи (олд томондан тугунча қилиб боғланган қизил рангли мато) акс эттирган. У эркакларнинг оддий бўйинбоғидан кескин фарқ қилади.