Харьков шаҳри Россия қўшинларининг «Град» залп билан ўт очиш тизимлари орқали оммавий ўққа тутилди, деб хабар қилди Украина ички ишлар вазири Антон Геращенко.

«Ўнлаб инсонлар қурбон бўлган, юзлаб инсонлар жабрланган. Тез тиббий ёрдам машиналари фожиа жойига йўл олган», — деб ёзган Геращенко ва шаҳарга берилган зарбалар оқибатлари акс этган бир нечта видео эълон қилган.

Бундан ташқари, ТСН канали ҳавола бераётган «Суспільне Харків» Telegram-канали маълумотларига кўра, Клочковский кўчасидаги кўп қаватли уйнинг юқори қаватларига снаряд келиб тушган. Бинонинг 10−11 қаватларига шикаст етган.

Аҳолидан олинган маълумотларга кўра, ракета келиб тушгач, жойларда автомат ўқ овозлари эшитилган.

Антон Геращенко ярим соат ўтиб ҳам, Харьковдаги аҳоли яшайдиган ҳудудларнинг ўққа тутилиши тўхтамаганини маълум қилган.