АҚШ президенти Жо Байден Давлат департаменти — ташқи сиёсат маҳкамасига Украина учун 600 млн доллар миқдорида ёрдам ажратиш топшириғини берди. Оқ уй президент имзолаган ҳужжат матнини эълон қилди.
«Давлат котибига зудлик билан Украинага ҳарбий ёрдам кўрсатиш ваколати берилсин», — дейилади АҚШ президенти имзолаган ҳужжатда.
АҚШ давлат котиби ваколатлари доирасида Украинага 250 млн доллар миқдорида беғараз ёрдам ажратиш АҚШ манфаатларига мос келиш-келмаслигини аниқлаши керак, дейилади ҳужжатда. Яна 350 млн доллар мудофаа соҳасига, жумладан, ўқитиш ва машғулотларни ташкил этишга йўналтирилади.
Аввалроқ Ой уч Конгрессдан Украинага ёрдам учун 6,4 млрд доллар ажратишни сўрагани маълум қилинган эди.
Шу билан бирга, Washington Post нашри АҚш Украина президенти Владимир Зеленскийга Киевдан хавфсизроқ жойга эвакуация қилиш таклифини билдиргани, бироқ Зеленский бу таклифни рад этганини хабар қилган эди.
Зеленский маъмурияти у пойтахтда қолиши ва унинг мудофаасига шахсан раҳбарлик қилишини айтганини маълум қилди. Бир неча дақиқалар муқаддам Зеленский Киевдан видеомурожаат қилиб, унинг мамлакатни тарк этгани ҳақидаги хабарлар ёлғон эканини билдирди.
