Украина президенти Владимир Зеленский РФ президенти Владимир Путинга Донбассдаги вазият бўйича музокаралар ўтказишни таклиф этди, деб хабар бермоқда РИА Новости.
«Яна бир карра Россия Федерацияси президенти Владимир Путинга мурожаат қилмоқчиман. Украинанинг бутун ҳудуди бўйлаб жанглар бормоқда. Келинг, одамларнинг ҳалок бўлишини тўхтатиш учун музокаралар столига ўтирайлик», деб айтган Зеленский Путинга мурожаатида.
РИА Новостининг Хитой ТИВига таяниб хабар беришича, Россия президенти Владимир Путин ХХР раиси Си Цзиньпинь билан мулоқот чоғида Россия Украина билан олий даражада музокаралар ўтказишга тайёрлигини билдирган.
Россия ва Украина ўртасида ўтказиладиган музокаралар жойи сифатида Беларусь пойтахти танланган.
Украинанинг ҳукмрон партияси бўлган «Слуга народа» сал вақт ўтиб, Зеленский нима сабабдан Россия президентига музокара таклиф этгани бўйича тушунтириш берди.
Партия раҳбари Елена Шулякнинг сўзларига кўра, шу вақтгача Киев Ғарб томонидан Россияни тўхтатишга қодир бўлган қадамларни кўрмаган. «Уларда осмонни ёпиб қўйиш учун етарли кучга эга эди. Россияни SWIFTдан узиб қўя оларди. Россияга қарши нефт эмбаргосини киритиб, экспортини тўхтатиб қўйиши мумкин эди. Аммо Ғарб бундай қилмаяпти», — деган Шуляк.
«Слуга народа» партияси раҳбари Ғарб томонидан киритилган янги санкцияларни инкор этмаётганини, шунчаки бу санкциялар етарли эмаслигини, улар ватанни ҳимоялашда ёлғиз қолганликларини қўшимча қилган.
РИА Новостининг РФ президенти матбуот котиби Дмитрий Песков сўзларига таяниб хабар беришича, Путин Украина делегацияси билан музокаралар ўтказиш учун Минскка делегация юборишга тайёрлигини билдирган. РФ томонидан музокараларда Мудофаа вазирлиги, ТИВ ва Кремль администрацияси вакиллари қатнашиши кутилмоқда.
Илгарироқ Украина президенти Владимир Зеленский Россия босқинининг биринчи кунида 137 нафар ҳарбий ҳалок бўлгани, яна 316 нафари жароҳатлангани ҳақида баёнот берган эди.
ТАСС айни вақтда БМТнинг Инсон ҳуқуқлари бўйича олий комиссари бошқармасига таянган ҳолда, Украинада отишмалар ва ҳаводан берилган зарбалар оқибатида камида 25 нафар тинч аҳоли ҳалок бўлгани ва яна 102 нафари жароҳатлангани ҳақида хабар бермоқда. Нашрнинг ёзишича, бошқарма расмий вакили Равин Шамдасани Женевада 25 февраль куни ўтказилган брифинг чоғида бу ҳақда айтган ва «қурбонлар ҳақида маълумотларни текшириш қийинлиги, уларнинг ҳақиқий сони анча кўп бўлиши мумкинлигини» билдирган.
Сал аввал Украина президенти офиси раҳбари маслаҳатчиси Михаил Подоляк Украина Россия билан нейтраллик мақоми ҳақида музокаралар ўтказишга тайёрлигини билдирган эди. Россия ТИВ раҳбари Сергей Лавров унга жавобан Россия исталган вақтда музокаралар ўтказишга тайёрлигини, аммо бунинг учун Украина қуролли кучлари қурол ташлаши кераклигини айтди.
Россия президенти Владимир Путин 24 февраль куни эрталаб миллатга телемурожаатида Донбасс ҳудудида «махсус ҳарбий операция» бошланганини эълон қилган эди ва РФ раҳбарининг мурожаати тугаши биланоқ, Киев, Харьков, Мариуполь, Одесса ва Украинанинг бошқа шаҳарларида портлашлар бошланганди.
Шундан сўнг дунё ҳамжамияти РФнинг Украинага босқинини қаттиқ қоралаб, Москвага қарши янги санкциялар пакетини эълон қилди.
