РФнинг Украинага амалга оширган ҳарбий операцияси оқибатида урушнинг биринчи кунида россиялик бизнесменлар 39 млрд доллар йўқотди, деб хабар бермоқда Bloomberg.
Бир кунда энг кўп маблағ йўқотган бизнесменлар рўйхатида етакчиликни «Лукойл» президенти Вагит Алекперов эгаллаган — 6,2 млрд доллар йўқотган (у эга бойликлар 13 млрд долларгача пасайган).
«Северсталь» директорлар кенгаши раҳбари Алексей Мордашов 4,2 млрд доллар йўқотган (унинг бойлиги 23 млрд долларгача пасайган).
«Норникель» президенти ва айни вақтда Россиянинг энг бой бизнесмени Владимир Потанин 3 млрд доллар йўқотган (унинг бойлиги 26,1 млрд долларгача пасайган).
Энг кўп маблағ йўқотган россиялик миллиардерлар бешлигини Алишер Усмонов якунлаган. Миллиардернинг бойликлари 1,2 млрд долларга камайган (унинг бойлиги 20,3 млрд долларгача пасайган).
Бундан ташқари, келиб чиқиши ўзбекистонлик бўлган Искандар Маҳмудов ҳам 0,9 млрд доллар йўқотганлиги айтилган.
Урушнинг биринчи кунидаги йўқотишлар Россиянинг барча бойлари учун энг катта йўқотиш бўлди, дея таъкидланган нашрда.
Хабарга кўра, Россиянинг базавий ҳисобланган MOEX Russia индекси Москвада 33% пастлаш билан ёпилган ва бу Москва фонди тарихида маҳаллий валютада бешинчи энг ёмон пастлаш бўлган.
Россия президенти Владимир Путин 24 февраль куни эрталаб миллатга телемурожаатида Донбасс ҳудудида «махсус ҳарбий операция» бошланганини эълон қилган эди ва РФ раҳбарининг мурожаати тугаши биланоқ, Киев, Харьковь, Мариуполь, Одесса ва Украинанинг бошқа шаҳарларида портлашлар бошланганди.
Шундан сўнг дунё ҳамжамияти РФнинг Украинага босқинини қаттиқ қоралаб, Москвага қарши янги санкциялар пакетини эълон қилди.
