Тошкентликлар украин халқини қўллаб-қувватлашларини билдириш мақсадида пойтахтдаги Украина элчихонасига гуллар, юмшоқ ўйинчоқлар ва ёзувлар олиб келишмоқда. «Газета.uz» мухбири дипломатик ваколатхона биносига ташриф буюрди.

Ёзувларда украин, ўзбек ва рус тилларида ёзилган: «Мысвами! #нетвойне» (#урушгайўқ), «Украина, держись!» (Украина, бардам бўл!), «Украинага тинчлик», «Сил татерпіння українському народу» (Украина халқига куч ва сабр) ва бошқа қайдларни кўриш мумкин.

Элчихонага гуллар ва ёзувлар олиб келган Тошкентда яшовчи фуқаро Мирзаёр Эркинов «Газета.uz» билан суҳбатда уруш ва агрессиянинг ҳар қандай кўринишига қарши экани ва уларни қоралашини маълум қилди.

«Унда ҳалок бўлган аскарлар украин бўладими ёки рус, улар ўзлари ишонган қадрият учун курашди, курашмоқда. Украин ўғлонлари Ватан ва озодлик учун қон тўкаётган бўлса, россиялик аскарлар нураётган ҳукуматнинг пуч ғоялари қурбони бўляпти. Бу жуда-жуда аянчли», — деди у.

У элчихона остонасига қўйган гуллари биринчи қадрият, муқаддас тушунчалар учун ҳалок бўлган аскар ва тинч аҳоли вакиллари ҳаққи-ҳурматига аталганини таъкидлади.

«Юртдошларимиз озодлик нафасини тўкис ҳис этишларини жуда истайман. Бу гуллар шундан ҳам бир умид. Агар биз урушни тугатмасак, уруш бизни тугатади, деган эди Герберт Уэллс. Украинада тинчлик бўлсин, ҳар бир давлат ўзининг тақдирини ўзи ҳал қилсин. Дунёда сиёсий қатағонлар, урушлар бўлмасин», — деди у.

24 февраль эрта тонгда Россия Украинага бостириб киришни бошлади. Россия президенти Владимир Путин Донбассда «махсус ҳарбий операция» бошланганини эълон қилиб, бундан кўзланган мақсад Украинани делимитаризация ва денацификация қилиш эканини таъкидлади. Дунё етакчилари Россиянинг Украинага бостириб киришини қоралашди. АҚШ, Британия, Канада, ЕИ, Япония янги санкциялар эълон қилганини билдирди.