25 февраль куни ташқи ишлар вазири Абдулазиз Камилов БМТнинг Ўзбекистондаги доимий координатори этиб тайинланган Роли Астханани қабул қилди, деб хабар берди ТИВ матбуот хизмати.
Вазир Роли Астханани ушбу лавозимга тайинлангани билан табриклаб, Ўзбекистон БМТ ва унинг ихтисослашган идоралари билан конструктив ва ишончли ҳамкорлик ўрнатганини таъкидлади.
«Янги доимий координаторнинг касбий ютуқлари ва иш тажрибаси ушбу ҳамкорликни янада чуқурлаштиришига умид қилинади», — дейилади хабарда.
Учрашувда интақавий хавфсизлик, Афғонистонни барқарорлаштириш ва тиклаш, замонавий таҳдид ва хатарларга қарши курашиш, оммавий қирғин қуролларини тарқатмаслик, ижтимоий-иқтисодий ривожланишга кўмаклашиш, экологик муаммоларни ҳал этиш, хусусан, Орол денгизи инқирози оқибатларини юмшатиш масалалари кўриб чиқилган.
Буюк Британиялик Роли Астхана февраль ойи бошида БМТнинг Ўзбекистондаги доимий координатори этиб тайинланган эди. Тайинловга қадар, у Буюк Британиянинг Хитойдаги ташқи ишлар, Ҳамдўстлик ва тараққиёт идорасининг (ФCДО) ривожланиш бўйича директори лавозимида ишлаган.
Роли Астхана Буюк Британиянинг Халқаро ривожланиш вазирлигида юқори лавозимларда ишлаган. У сўнгги йилларда тоза ва яшил инфратузилма лойиҳалари орқали ташкилотнинг тикланиш ишларига раҳбарлик қилган. У барқарор ривожланиш соҳасида 25 йилдан ортиқ тажрибага эга.
БМТнинг Ўзбекистондаги собиқ координатори Ҳелена Фрейзер 2021 йилнинг ёзида ўз миссиясини якунлаганди.
