Иккинчи курсдан талабаларга ишлаш имконияти берилиши мумкин. Бу ҳақда олий ва ўрта махсус таълим вазири Абдуқодир Тошқулов Қорақалпоғистонда талабалар билан учрашув давомида маълум қилди.
Унинг сўзларига кўра, талабаларга амалиёт муддатини кўпайтириш керак.
«Керак бўлса, бутун ўқув режада қатор ОТМларда 70% амалиёт қилиш керак. Педагогика йўналишда 4+2 йўналишини жорий қилиш — 4 кун институтда, 2 кун мактабда», — деди вазир.
«Биласизларми, биз бугунгача қандай бюрократиялар қилдик-да, сиртқи таълимда ўқийдиган талабани ишга олмадик. Ўзи сиртқи [таълим]дан мақсад нима? Ишлаб, ўқисин… Йўқ, сен олдин битириб, дипломингни ол, кейин ишга оламиз, дедик. Ўқиб турган талабани агар бирор қариндош уруғлиги бўлмаса, катта курс бўлмаса, уни ҳам [ишга] олмадик», — деди Абдуқодир Тошқулов.
Эндиликда олий таълим муассасаларида ишлаш билан боғлиқ янги тизим яратилиши, талабаларга 2 курсдан бошлаб ўз йўналишида ишлашига рухсат берилиши маълум қилинди.
«Биз ҳозир шундай тизим қилмоқчимиз, менимча педагогика йўналишлари бундан жуда хурсанд бўлади. Иккинчи курсдан бошлаб, бемалол мактабларга бориб, ойлик олиб ишлаш мумкин бўлади. Педагогика бўйича президентимиз йиғилиш қилди ва шунда қатъий таъкидлади-ки, иккинчи курсдан бориб, ҳам ўқисин, ҳам ишласин», — дея таъкидлади у.
Шунингдек, у бунда талабаларнинг асосан ўз соҳаси бўйича ишлашини сўраган.
«Ишлаганда ҳам ўзининг соҳасида ишласин. Мен буни ҳурмат қиламан. Мен ҳам [талабалик вақтимда] якшанба кунлари меҳмонхоналарга бориб юк туширганман, яхши яшаш учун. Ўртаҳол оилада катта бўлганман. Лекин, ўзининг йўналиши бўйича оз бўлса ҳам пул топганларга ҳавасим келади», — деди вазир.
«Масалан архитектура, қурилиш технологияларидаги [талаба]лар шунақа ўқишга бориб, озгина ишлаб ойлик олса, кундан-кун ўсиб кетаверади. Официант бўлиб ишлагандан кўра, туризмда, меҳмонхона хўжалигида ўқиётганлар бўлса, майли бўлсин, лекин, юридик ва журналистикада ўқиётганлар, бошланғич таълим [йўналишида] ўқиётганлар соҳаси бўйича кетиши керак», — деди Абдуқодир Тошқулов учрашувда.
