НАТО доимий вакиллари пайшанба куни бўлиб ўтган йиғилишда иттифоқдошларни ҳимоя қилиш учун инқироз даврида альянс мамлакатларига жавоб қайтариш кучларини жойлаштиришни кўзда тутган мудофаа режасини амалга оширишга келишиб олдилар, дея маълум қилди РИА Новости альянс бош котиби Йенс Столтенберг сўзларига таяниб.

«Биз вужудга келган вазиятни муҳокама қилдик, доимий вакиллар ҳарбий маслаҳатчилардан тавсияларни олганларидан кейин альянс давлатларига инқироз вақтида, жумладан, тезкор жавоб қайтариш кучларини жойлаштиришни кўзда тутувчи мудофаа режамизни амалга оширишга келишиб олдилар», — дея маълум қилди у.

Бош котиб кўриладиган чоралар иттифоқдошларни ҳимоя қилишга қаратилганини қўшимча қилди.

Шу билан бирга, Йенс Столтенберг НАТО Украинада альянс кучларини жойлаштирмоқчи эмаслигини билдирди.

Бундан ташқари, у Босфор бўғозини Россия кемалари учун ёпиш ҳам кўзда тутилмаганини қайд этиб ўтди. Аввалроқ Украинанинг Анқарадаги элчиси Киев Туркиядан Босфор ва Дарданел бўғозларини Россия учун ёпишни сўраган эди.

НАТО бош котиби 25 февраль куни Украина бўйича онлайн саммит бўлиб ўтишини ҳам маълум қилди.

Аввалроқ Йенс Столтенберг РФнинг Украинадаги ҳаракатларини қоралаши ҳақида баёнот билан чиққан эди.

«Мен Россиянинг Украинага асоссиз вахоинона ҳужумини кескин қоралайман. Ҳужум кўплаб инсонларнинг ҳаётини хавф остига қўймоқда», деган НАТО раҳбари ўз баёнотида.

Столтенберг Россиянинг Украинага бостириб кириш ҳаракатини «халқаро ҳуқуқнинг жиддий бузилиши», «евроатлантика хавфсизлигига таҳдид» сифатида баҳолаган.