Қорақалпоғистон Республикаси сафарининг иккинчи куни президент Шавкат Мирзиёев Беруний туманида қуввати 100 МВт бўлган шамол электр станцияси қурилишига тамал тошини қўйди. Бу ҳақда блогер Азиза Қурбонова хабар берди.
«Тасаввур қилинглар фарзандларимиз, неваларимиз бундай лойиҳадан қандай манфаат кўради. Бу бир йиллик эмас, йилларга татийдиган лойиҳа», — деди Шавкат Мирзиёев.
Президент тамал тошига солган капсула ичидаги мактубда шундай ёзилган: «…Электр энергияси билан узлуксиз таъминлаш, шунингдек Қорақалпоғистон Республикасининг бетакрор экомуҳитини муҳофаза қилиш мақсадида Саудия Арабистонининг Acwa Power компанияси билан ҳамкорликда Қорақалпоғистон Республикасида 100 МВт қувватли янги шамол электр станциясининг қурилишини бошлаш учун кенг жамоатчилик бугун 2022 йил 24 февраль куни тамал тошини қўйишга қарор қилдик. Ушбу лойиҳа ҳудуднинг ижтимоий-иқтисодий тараққиёти ҳамда аҳоли фаровонлигини таъминлашда мустаҳкам асос бўлиб хизмат қилади. Шавкат Мирзиёев — Ўзбекистон Республикаси Президенти».
Аввалроқ, президент Саудия Арабистонининг «ACWA Power» компанияси 20га яқин етакчи компаниялар ўртасида ўтган танловда 1 кВт/соат электр энергияси учун 2,57 АҚШ центи тариф таклифи билан ғолиб деб топилганини адолатли ва рақобат билан бўлганини айтганди.
Маълумот ўрнида, «ACWA Power» компанияси Беруний туманида 100 МВт қувватли янги шамол электр станциясини қуради. Мазкур электр станция 2024 йилда ишга туширилиши кутилмоқда ва у йилига 350 миллион кВт-соат электр энергияси ишлаб чиқариб, 120 мингдан ортиқ хонадонни электр энергияси билан таъминлайди. Бунинг натижасида 106 миллион куб метр табиий газ тежалишига эришилади, ушбу ҳажмдаги тежалган газ билан 35 мингта хонадонни 1 йил давомида табиий газ билан таъминлаш мумкин.
