Украинада содир бўлган охирги янгиликлар
Украина Миллий хавфсизлик ва мудофаа кенгаши Донецк ва Луганск вилоятларидан ташқари бутун мамлакат бўйлаб фавқулодда ҳолат эълон қилишга қарор қилди. Фавқулодда ҳолат 30 кунлик муддатга жорий этилиши режалаштирилган, бу қарор энди Олий Рада томонидан тасдиқланиши керак. Бундан ташқари, Украина чегара хизмати Россия ва Беларусь билан чегарада қўшимча чекловлар жорий қилмоқда. Украина Миллий хавфсизлик ва мудофаа кенгаши котиби Олексий Данилов депутатлар 48 соат ичида фавқулодда ҳолат жорий этилишини маъқуллашини кутмоқда.
Украинада давлат муассасалари веб-сайтларига янги киберҳужум содир бўлди. Ҳукумат, Олий Рада, Ташқи ишлар вазирлиги сайтлари ишламади. Мамлакат ички ишлар ва мудофаа вазирликларининг веб-сайтлари суст ишламоқда.
16 февраль куни Украина ҳукумати веб-сайтларига ДДоС ҳужумлари уюштирилганди, шу сабабли Украина Ички ишлар вазирлиги жиноий иш қўзғатди. Киевда улар Россия ва Хитойни киберҳужумлар уюштирганликда гумон қилинаётганини маълум қилди. АҚШ ва Буюк Британия ҳам Россиянинг иштирокини эълон қилди. Россия Ташқи ишлар вазирлиги бу айбловларни рад этган — Коммерсантъ.
Украина Ташқи ишлар вазирлиги украиналикларга Россия ҳудудида консуллик ёрдами кўрсатиш имконияти кутилаётган чеклов туфайли ушбу давлатга ҳар қандай сафарлардан воз кечишни тавсия қилди. Россияда бўлган Украина фуқароларига дарҳол чиқиб кетиш тавсия этилади — Интерфакс.
Вазирлик «ушбу тавсияларни эътиборсиз қолдириш Россияда Украина фуқаролари учун тегишли ҳимояни таъминлашни сезиларли даражада мураккаблаштиришини» таъкидлади.
Путин ва Эрдоған Украина шарқидаги можарони ҳал қилиш бўйича телефон орқали мулоқот қилди
Россия ва Туркия президентлари Владимир Путин ва Режеб Таййип Эрдоған телефон орқали мулоқот қилди. Эрдоған Туркия Украина атрофидаги можарони тинч йўл билан ҳал қилишда ёрдам беришга тайёрлигини айтди. Шунингдек, у Туркия ДХР ва ЛХРнинг тан олинишига қарши эканлигини ва бу қарор Украина суверенитети ва ҳудудий яхлитлигига қарши қаратилганлигини таъкидлади. Туркия раҳбари минтақадаги ҳарбий можаро ҳеч кимга фойдали эмаслигини қўшимча қилди — Коммерсантъ.
Россия Ташқи ишлар вазирлиги АҚШ санкцияларига қарши «кучли ва сезиларли жавоб» қайтарилишига ваъда берди
Россия ТИВ АҚШнинг ДХР ва ЛХР мустақиллигини тан олиши муносабати билан жорий қилган янги санкцияларига «қаттиқ жавоб» беришга ваъда берди.
«Шубҳа бўлмаслиги керак — санкцияларга қатъий жавоб берилади, бу симметрик бўлиши шарт эмас, балки Америка томони учун „кучли ва сезиларли жавоб“ бўлади», —дейилади Россия ТИВ баёнотида.
Шимолий Корея АҚШни Японияни Россияга қарши кампанияга жалб қилишда айбламоқда
КХДР Ташқи ишлар вазирлиги Қўшма Штатларни Японияни Курил ороллари борасидаги позициясини қўллаб-қувватлаб, «Россияга қарши кампанияга» жалб қилишда айблади. Аввалроқ, 7 февраль куни АҚШ Токионинг баҳсли Курил ороллари бўйича суверенитетини тан олишини маълум қилганди — Коммерсантъ.
«Россия ва АҚШ ўртасида Украина бўйича қарама-қаршилик кескин кучайган бир пайтда Шимолий ҳудудларда Япония суверенитетини қўллаб-қувватлаган Қўшма Штатларнинг мақсадлари ўзининг кичик иттифоқчиси Японияни урушнинг олдинги чизиғига суришдир», — дейилади Шимолий Корея Ташқи ишлар вазирлиги баёнотида.
24 февраль куни Брюсселда Украина бўйича Европа Иттифоқининг фавқулодда саммити бўлиб ўтади
24 февраль куни Брюсселда Россия томонидан ЛХР ва ДХР мустақиллигини тан олиши муносабати билан Европа Иттифоқи давлат ва ҳукумат раҳбарларининг фавқулодда саммити бўлиб ўтади. Бу ҳақда чоршанба куни Европа Кенгаши президенти Чарлз Мишелнинг иттифоқнинг 27 давлат раҳбарига йўллаган мактубига таяниб ТАСС хабар берди.
«Россиянинг тажовузкор ҳаракатлари халқаро ҳуқуқни, Украинанинг ҳудудий яхлитлиги ва суверенитетини бузади. Улар Европа хавфсизлик тартибига ҳам путур этказади. Биз бирлашиб ва қатъиятли бўлиб, жамоавий ёндашув ва ҳаракатларимизни биргаликда белгилашимиз муҳим», — дейилади хатда.
