БМТ бош котиби Антониу Гутерриш Россия томонидан Украинанинг Донецк ва Луганск вилоятлари айрим ҳудудлари мустақиллигини тан олиш бўйича қабул қилинган қарорни Украина ҳудудий яхлитлиги ва суверенитетини бузиш деб атади. Бу ҳақда БМТ ахборот хизмати хабар бермоқда.
Россия томонидан қабул қилинаётган бир томонлама чоралар БМТ Низоми тамойилларига зид ва БМТ Бош Ассамблеясининг дўстона муносабатлар тўғрисидаги декларациясига мувофиқ келмайди, деди БМТ раҳбари 22 феврал куни бўлиб ўтган брифингда.
«Бу Хавфсизлик Кенгаши томонидан тасдиқланган Минск келишувларига ҳалокатли зарба», — деди бош котиб. — БМТ Низоми тамойиллари — бу ресторандаги меню эмас. Уларни танлаб қўллаш мумкинмас. БМТга аъзо давлатлар уларни тўлиқ қабул қилган, шунинг учун улар бу тамойилларга тўлиқ риоя қилишлари керак".
Антониу Гутерриш тинчликни қўллаб-қувватлаш концепциясининг бузиб кўрсатилиши уни ташвишга солаётганини билдирган. «Мен БМТнинг тинчликни сақлаш бўйича ютуқларидан фахрланаман, кўплаб „Мовий каскалар“ тинч аҳолини ҳимоя қилиш учун ўз жонларини қурбон қилмоқда», — деди Антонио Гутерриш. — Аммо бир давлатнинг қўшинлари бошқа давлат ҳудудига унинг розилигисиз кирса, уларни мутлақо тинчликпарвар деб ҳисоблаш мумкин эмас".
Бирлашган Миллатлар Ташкилоти, Антониу Гутерришнинг сўзларига кўра, Украинанинг халқаро тан олинган чегаралари доирасидаги суверенитети, мустақиллиги ва ҳудудий яхлитлигини тўлиқ қўллаб-қувватлайди.
«Мана шу инқирозли паллада мен зудлик билан ўт очишни тўхтатишга ва қонун устуворлигини тиклашга чақираман. Ҳозир вазминлик ва ақл-идрок зарур. Зудлик билан вазиятни юмшатиш керак», — деб баёнот қилди у. — Мен барча томонларни бундай хавфли вазиятни ҳалокат ёқасига олиб бориши мумкин ҳаракатлар ва баёнотлардан тийилишга чақираман. Украинага Россия қўшинларининг қўшимча киритилиши зиддиятни фақат оширади. Биз тинчлик учун, Украина ҳамда бошқа мамлакатлар халқини уруш балосидан қутқариш йўлида бирлашишимиз ва бу муаммони биргаликда ҳал қилмоғимиз керак. Мен бу инқироз бундан буёғига қон тўкилмасдан ҳал этилишининг қатъий тарафдориман".
Антонио Гутерриш содир бўлаётган воқеаларни «сўнгги йилларда тинчлик ва хавфсизлик соҳасидаги энг катта глобал инқироз» деб атади. «Биз, мен ҳеч қачон шундай бўлмайди, деб умид қилган, бир вазиятни бошдан кечиряпмиз, — деди у. — Украина атрофидаги сўнгги воқеалар ривожи: ўт очишни тўхтатиш режимининг кўпсонли бузилиши ҳолатлари, вазият янада зиддий тус олиши хавфи ҳақидаги хабарлардан жуда хавотирдаман».
