Украина президенти Владимир Зеленский 22 февраль куни Россия президенти Владимир Путиннинг ўзини ўзи республика деб эълон қилган Донецк ва Луганск халқ республикалари мустақиллигини тан олиши тўғрисидаги қароридан сўнг миллатга мурожаат билан чиқди. Мурожаат Украина раҳбари матбуот хизмати томонидан эълон қилинган.

Зеленскийнинг сўзларига кўра, Россия ўз қарорлари билан Украина суверенитети ва ҳудудий яхлитлигига раҳна солмоқда ва 2014 йилдан бери Донбассда бўлиб келаётган рус қўшинларини легаллаштирмоқда.

«Украина РФнинг охирги ҳаракатларини сўзсиз давлатимизнинг суверенитети ва ҳудудий яхлитлигини бузиш сифатида баҳолайди. Бу қарорлар оқибатлари учун жавобгарлик тўлалигича Россия сиёсий раҳбарияти зиммасида бўлади», — дея таъкидлади у.

Бундан ташқари, Зеленскийнинг сўзларига кўра, оккупация қилинган ҳудудлар Донецк ва Луганск вилоятлари мустақиллигининг тан олиниши Россиянинг Минск битимидан бир томонлама чиқишини ва «норманд тўртлиги» доирасида қабул қилинадиган қарорларни эътиборсиз қолдириши мумкинлигини англатиши мумкин. «Саккиз йил давомида урушни қўллаб-қувватлаб келган мамлакат, ўзи таъкидлаётганидек, тинчликни қўллаб-қувватламайди», — деди Украина раҳбари.

Зеленский БМТ Хавфсизлик кенгаши ва ЕХҲТ мажлисларини ҳамда «норманд тўртлиги» шошилинч саммитини ўтказиш ташаббуси илгари сурилганини маълум қилди.

«Шерикларимиздан аниқ ва таъсирчан чоралар қабул қилинишини кутиб қоламиз. Ҳозир ким ҳақиқий дўст ва шериклиги-ю, ким эса шунчаки гапда РФни қўрқитишда давом этишини билиш жуда муҳим», — дея таъкидлаган у.

Зеленский Украина сиёсий-дипломатик келишув тарафдори эканини ва турли провокацияларга берилмаслигига ишонтирди.

«Ҳақиқат биз томонда. Биз ҳеч қачон сиздан ҳақиқатни яширмаймиз. Вазиятда ўзгаришни кўришимиз биланоқ, хатарлар ортганини кўришимиз ҳамон — сиз бундан хабар топасиз. Айни вақтда тартибсиз ҳаракатлар учун ҳеч қандай сабаб йўқ. Биз шундай бўлиб қолиши учун барча чораларни кўрамиз», — деб айтган Украина раҳбари.

Зеленский украинларнинг доно ва донишманд халқ эканини яна бир карра исботлаган, хотиржамликни йўқотмай, ҳар нега қарамасдан барчасига оғир-босиқлик билан муносабатда бўлаётган Украинанинг барча фуқароларига яна бир бор миннатдорлик билдирди.

«Биз ўз заминимиздамиз. Биз ҳеч нарсадан ва ҳеч кимдан қўрқмаймиз, ҳеч кимдан ҳеч нарса қарздор жойимиз йўқ, ҳеч кимга ҳеч нимани ўтиб бермаймиз. Ҳозир 2014 йилнинг феврали эмас, 2022 йилнинг феврали. Бу бошқа давлат. Бошқа армия. Мақсад битта: тинчлик», — деб баёнот қилди у.

«Биз кўпдан буён ҳаммасига тайёрмиз. Уйқусиз тун учун сабаб йўқ», — дея ишонтирган Владимир Зеленский.