«Спутник» мавзесидаги эскирган 2 қаватли 409 та ёғоч уй бузилади. Бу ҳақда Янгиҳаёт туманида фаоллар билан учрашувда президент Шавкат Мирзиёев маълум қилди.

Гап «Спутник» мавзесида 1966 йилги зилзиладан сўнг, вақтинча фойдаланиш учун тез фурсатларда қурилган икки қаватли ёғоч уйлар ҳақида бормоқда.

Президентнинг айтишича, бу уйларнинг эгаларини замонавий кўп қаватли турар-жойларга кўчириш дастури бошланади.

Хусусан, келгуси беш йилда «Янги Дархон» маҳалласидаги 14 гектар ҳудудда янги кўп квартирали уйлар қурилиши режалаштирилган.

«Авариявий ҳолатда бу уйлар. Ўрнига янги ва сифатли уй қурилса, тўғри тушунтирилса, одамлар ўзи истайди кўчишни. Агар бирорта одам бу ота-бобомдан қолган уйим, бу уй мен учун музей, кўчмайман, деса кўчирмаймиз», — деган Шавкат Мирзиёев.

Эслатиб ўтамиз, Тошкент шаҳрининг Янгиҳаёт туманида жойлашган 409 та авария ҳолатидаги уйлар бузиб ташланиши ҳақида ўтган йили 25 февраль куни туман ҳокими Ҳаёт Иноғомов ҳам гапирган эди.

Ҳоким ўшанда «туман марказида 149 гектар ҳудудда хавфсизлик талабларига жавоб бермайдиган икки қаватли ёғоч уйлар мавжуд"лигини айтиб, мазкур уйларда истиқомат қилувчи аҳолини барча коммуникация ва шароити бор янги уйларга кўчириб ўтказиш бўйича туркиялик мутахассислар билан биргаликда лойиҳа ишлаб чиқилаётганини қўшимча қилганди.