ДХХ Хоразмда ўтказилган тезкор тадбирларда фиригарликда гумон қилинган шахсларни қўлга олди.

Хонқа тумани Давлат солиқ инспекцияси ходими иккита МЧЖ фаолиятлари бўйича ўтказилган камерал солиқ текшируви натижасига кўра, бюджетга қўшимча ҳисобланган 720 млн сўмлик солиқ тўловларини таниш ҳамкасби имкониятлари орқали камайтириб беришни ваъда қилган.

Бунинг эвазига ушбу МЧЖлар раҳбаридан 5 минг АҚШ доллари олган вақтида қўлга тушгани айтилмоқда.

Хоразмда аниқланган бошқа бир ҳолатда эса кредит олиб беришга уринган фуқаролар ушлангани айтилмоқда.

Ҳазорасп туманида яшовчи 1980 й.т., муқаддам судланган икки фуқаро Урганч шаҳридаги МЧЖлардан бирининг раҳбари юк автомашиналари харид қилиш учун 10 млрд сўм миқдорида кредит олмоқчи эканлигидан хабар топиб, унга бу борада танишлари орқали ёрдам беришларини айтишган.

Бунинг эвазига 45 минг АҚШ доллар талаб қилишган. Шундан 15 минг долларни аванс сифатида олганида қўшга тушган.

Ҳар иккала ҳолат юзасидан гумонланувчиларга нисбатан жиноят иши қўзғатилиб, ҳозирда тергов ҳаракатлари олиб борилмоқда.

Аввалроқ, Жиззах давлат педагогика институтининг таълим сифатини назорат қилиш бўлими бошлиғи факультетлардан бирида аниқланган камчиликлар деканга салбий таъсир қилмаслиги ва уни лавозимида қолишини таъминлаш эвазига 100 минг доллар олганида қўлга тушгани ҳақида ёзгандик.