️Дипломлари тўғридан-тўғри (махсус синовларсиз) тан олинадиган хорижий ОТМлар рўйхати тасдиқланди, дея хабар бермоқда Таълим сифатини назорат қилиш Давлат инспекцияси. Тўлиқ рўйхат (pdf).
Quacquarelli Symonds (QS) World University Rankings, Times Нigher Education, Academic Ranking of World Universities ташкилотлари томонидан халқаро ОТМ рейтингида биринчи 1000 талик таълим муассасаларининг 2022 йил учун рўйхати эълон қилинди.
QS жаҳон университетлари рейтингида энг юқори ўринларни АҚШ ва Буюк Британиядаги ОТМлар эгаллаган. Умумий ҳисобда айнан QS World University Rankings рейтинги ичидаги 144 та ОТМ (14%) АҚШда жойлашган. 76 таси (7%) Буюк Британияда жойлашган. Қолаверса, Россиянинг 35 та таълим муассасалари ҳам ТОП рейтингга киритилган. Марказий Осиёдан фақат Қозоғистоннинг 12 та олийгоҳи мазкур рўйхатда бор. Ўзбекистон ОТМлари рўйхатда йўқ.
Фото: Quacquarelli Symonds World University Rankings
Times Нigher Education рўйхати рейтингида ҳам энг кўп ОТМ айнан АҚШда жойлашган — 169 та (16%). 93 та (9%) ОТМ Буюк Британиядан киритилган. Шунингдек, Россиянинг 18 та таълим муассасаси мазкур рўйхатдан ўрин олган. Бу рейтингда Марказий Осиёнинг бирорта ОТМи йўқ.
Фото: Times Нigher Education
Academic Ranking of World Universities рўйхатига кўра, АҚШдан 197 та (19,7%), Буюк Британиядан 66 та (6,6%), Россиядан эса 9 та. Бу рўйхатда ҳам Марказий Осиёдан бирорта ОТМ мавжуд эмас.
Фото: Academic Ranking of World Universities
Маълумот учун, ушбу рўйхатга киритилган, яъни халқаро эътироф этилган ташкилотларнинг (QS, THE, ARWU) рейтингида биринчи 1000 талик рўйхатидан жой олган хорижий олий таълим муассасаларида олинган дипломлар тўғридан-тўғри (махсус синовларсиз) тан олинади. Президентнинг тегишли қарорига кўра, ҳужжатларни тан олиш учун талабгорлар томонидан бевосита давлат хизматлари марказлари орқали ёки Ягона интерактив давлат хизматлари порталида рўйхатдан ўтган ҳолда мурожаат қилиши керак бўлади.
