Тошкент шаҳрининг Миробод туманида номаълум эркак ҳайвонларни пневматик қурол билан отганлиги айтилмоқда. Бу ҳақда «Mehr va Oqibat» ҳайвонларни ҳимоя қилиш жамияти хабар бермоқда.

М.Н. исмли аёлнинг жамият директори номига қилган мурожаатига кўра, 4 февраль куни унинг мушуги танасида жароҳат билан уйга қайтган.

Аёл эртаси куни мушугини ветеринария клиникасига олиб борган. Ўтказилган рентген тадқиқотларида жонивор танасига пневматик қурол ёрдамида жароҳат етказилганини тахмин қилувчи элементлар аниқланган. Шундан сўнг жониворни зудлик билан операция қилиш ҳақида қарор қабул қилинган.

Орадан бир қанча вақт ўтиб, аёл ўз қўшниси А.И.ни қўлида пневматик қурол билан кўрганлиги, А.И. у билан кўчадаги мушук ва итларни нишонга олаётганлигининг гувоҳи бўлганини айтмоқда. А.И. аёл билан телефон мулоқоти пайтида ҳақиқатан ҳам ит ва мушукларни пневматик қуролдан отганини тан олган.

Жамият томонидан А.И. 4 февраль куни соат 11.28да пневматик қурол билан уйидан чиқиб, номаълум томонга ҳаракатланаётганлиги акс этган видео ҳам эълон қилинган. Жамиятга мурожаат қилган аёлнинг яна уч нафар қўшниси ҳам ушбу ҳолатнинг гувоҳи бўлганликларини тасдиқлаган.

«Mehr va Oqibat» жамияти ариза келиб тушгач, ҳайвонларга шавқатсиз муносабатда бўлган шахсни жиноий жавобгарликка тортишни сўраб Ўзбекистон ИИВ, Тошкент шаҳар ИИББ ҳамда Миробод тумани ИИБга ариза билан мурожаат қилган.

Тошкент шаҳар ИИББ матбуот хизматининг «Газета.uz» га хабар беришича, ушбу ҳолат юзасидан Миробод тумани ИИО ФМБ томонидан терговгача суриштирув ишлари олиб борилмоқда. Шунингдек, ушбу мурожаат Тошкент шаҳар ИИББ назоратига олинган. «Қонуний қарор қабул қилиниши билан батафсил маълумот берилади», деди ИИББ вакили.