2021 йил 1 апрелидан 1 августигача бўлган муддатда биринчи доза вакцина билан эмланган фуқаролар февраль ойигача биринчи дозасини олганига 6 ой ва ундан ортиқ вақт ўтган аҳоли қатламига кириб, улар 5,2 млн нафарни ташкил этди.

Санитария-эпидемиология хизмати матбуот хизмати хабар беришича, шундан 733,8 минг нафар фуқаро бустер доза билан эмланди.

«Мутахассисларнинг фикрича бустер доза вакцина билан эмланиш „альфа“, „дельта“ штаммларидан ташқари „омикрон“ штамми билан чақирилган COVID-19 касаллигидан ҳам ҳимоя қила олади. Мабодо касаллик юқиб қолгудек бўлса ҳам у жиддий асоратларсиз, енгил ўтиб кетади», — дейилади хабарда.

2021 йилнинг 17 ноябридан бошлаб тўлиқ вакцина курсини олган фуқароларни бустер доза билан ихтиёрий эмлаш бошланганди.

Бустер доза билан эмланувчи контингентга тўлиқ вакцина курсини якунлаган, ўз навбатида вакцинанинг биринчи дозасини олганига 6 ой ва ундан ортиқ вақт ўтган аҳоли қатлами киради.

Бустер доза олмоқчи бўлган аҳоли республиканинг барча даволаш профилактика муассасаларнинг эмлаш пунктларида эмланишлари мумкин.

Эмлаш пунктида бустер дозани вакцинанинг ҳар қандай туридан фойдаланган ҳолда олиши мумкин.

ССВ маълум қилишича, 10 февраль ҳолатига биринчи доза билан эмлаш кўрсаткичи эмланиши режалаштирилган қатламга нисбатан 90,9 фоизни, тўлиқ босқичларда эмланиш кўрсатчики эса 70 фоизни ташкил қилмоқда. Ҳозирга қадар жами 42,8 доза вакцинадан фойдаланилган.

Эслатиб ўтамиз, 2021 йилнинг июлб ойи охирларида 1 ноябрга қадар Ўзбекистон аҳолисининг 70 фоизини коронавирусга қарши эмлаш режалаштирилганди. Ўша вақтда республика бўйлаб 5,4% аҳоли инфекцияга қарши тўлиқ эмланганди.