Ўсимлик ёғи, кунгабоқар, соя данаги ва зиғир уруғи учун ҚҚС имтиёзлари 4 ойга узайтирилди. Бу президент 9 феврал куни имзолаган айрим қонун ҳужжатларига ўзгартиш ва қўшимчалар киритишга оид қонунда назарда тутилган.
Аввалроқ, асосий озиқ-овқат маҳсулотлар, жумладан, ўсимлик ёғи, кунгабоқар ва зиғир уруғи импорти ва реализацияси учун ҚҚС берилган имтиёзлар муддати 2022 йилнинг 30 апрелигача узайтириш тўғрисидаги ҳужжат лойиҳаси ишлаб чиқилгани ҳақида ёзгандик.
Адлия вазирлигининг хабар беришича, янги тартибга мувофиқ қуйидагиларнинг ҚҚСдан озод қилиш муддати 2022 йил 30 апрелгача узайтирилди:
- Ўзбекистонга ўсимлик ёғи, кунгабоқар ва зиғир уруғи, шунингдек соя данагини олиб кириш;
- ўсимлик ёғини (пахта ёғидан ташқари) ишлаб чиқариш ва (ёки) реализация қилиш бўйича айланма.
Бунга қадар, ушбу маҳсулотлар 2021 йил 31 декабргача ҚҚСдан озод қилинганди.
Бундан ташқари, эндиликда автомобиллар электрон аукцион орқали ижарага берилганда шартномани нотариал тасдиқлаш ҳам талаб этилмайди.
