Президент Шавкат Мирзиёев Самарқанддаги 59-сон кўзи ожизлар мактаб-интернатига бориб, ўқитувчи ва ўқувчилар билан суҳбатлашди, деб хабар берди блогер Азиза Қурбонова.
Президент интернатдаги ҳар бир устоз ва ўқувчига бирма-бир салом бериб чиққан ва улар «ассалому алайкум» ни эшитибоқ ички сезги билан қўл узатишди.
Ўқитувчилардан бири ногиронлиги бўлган шахсларнинг пенсиясини қайта ҳисоблаш муддатини ёшартириш масаласини кўтарган. Президент бу масалада ижтимоий адолат ўрнатилишини айтди.
Яна бир ўқитувчи — Нигора Маликова эса ўзи шу мактабни битиргани, 2003 йилда Шавкат Мирзиёев ҳоким бўлган пайтида бу ерга келганини эслаб ўтди.
Ўқитувчи иккала фарзанди ҳам шу ерда эканини, ўз фарзандлари мисолида бошланғич синфларда кўзи ожиз болалар яхши таълим олиши кераклиги, бунинг учун 2009 йилдан буён янгиланмаётган брайл ёзувидаги айрим ўқув дарсликларини қайта ишлаш зарурати ҳақида сўзлаган. Ааёл бу гапни президентга йиғлаб айтиб берди.
Президент бунга муносабат билдириб, нафақат мактаб, олий ўқув юртлари дарсликларини ҳам брайлга кўчириш, компьютер дастурларини ишлаб чиқиш бўйича иш олиб боришини маълум қилди.
«Ҳеч қачон кўзингизда ёш бўлмасин, менинг бу ерга келганим баландпарвоз намойиш эмас, сизни қийнаётган муаммоларни ўзим билгани ва ҳал қилгани келдим», — деди давлат раҳбари.
Шунингдек, давлат раҳбари, 59-мактаб-интернат қошида кўзи ожиз болалар учун мактабгача таълим ташкилоти очиш бўйича ҳам алоҳида топшириқ берган.
«Дарё»нинг ёзишича, давлат раҳбари ушбу мактабда ўқитувчи ва ўқувчилар билан суҳбатда бўлиб, у ерда ўқийдиган уч нафар қизга олий ўқув юртларига имтиҳонсиз ўқишга кириши бўйича қарорга имзо чекишини айтган.
Шунингдек, Шавкат Мирзиёев мактабнинг ўқитувчиларидан бири билан суҳбатда бўлган ва унинг қизига пианино совға қилишини айтган. Бундан ташқари, президент у қизга ҳам олий ўқув юртига ўқишга кириши бўйича қарорга имзо чекишини таъкидлаган.
Президент матбуот котиби Шерзод Асадов эълон қилган видеода Шавкат Мирзиёев шундай деди: Сизлар олийгоҳни тугатгунларингизча, ҳар бир йўналиш, сизлар эгаллаган касб бўйича ҳар бир давлат идорасида иш ўрни бўлиши керак. Ана шундай ҳаётимиз мутлақо ўзгаради ва адолат деганда ана шу адолат бўлади".
Аввалроқ, президент Самарқандга ташрифи давомида қарийб битиб, пардозлаш ишлари олиб борилаётган Самарқанд халқаро аэропортига ташриф буюрганди.
