10 февраль куни президент Шавкат Мирзиёев анъанага кўра, Самарқандга ташрифи чоғида буюк муҳаддис Имом Бухорий қабрини ва Ҳазрати Ҳизр мажмуасидаги биринчи президент Ислом Каримов мақбарасини зиёрат қилди. Бу ҳақда унинг матбуот хизмати хабар берди. Қуръон тиловат қилинди.
Суратларда давлат раҳбарига Ўзбекистон мусулмонлари идораси раиси, муфтий Нуриддин Холиқназаров ҳамда Самарқанд вилояти ҳокими Эркинжон Турдимов, қурилиш вазири Ботир Зокиров ҳамроҳлик қилган.
Президент Имом Бухорий мажмуа қурилишини кўздан кечирди. Бу ерда қарийб 10 минг намозхонга мўлжалланган масжид, тўртта минора, айвонлар барпо этилмоқда.
Мақбаранинг ўнг томонида, еростида галерея қурилмоқда. Бу ерда зиёратчилар аллома қабрини кўриш имкониятига эга бўлади. Мақбара наққошлик ва хаттотлик санъати асосида сайқалланади. Унинг деворларига қадимий услубда Қуръони карим суралари ва ҳадислар ёзилади.
Шу ерда галдаги қурилиш ишлари ҳақида маълумот берилди. Мажмуа ёнида меҳмонхоналар, автотураргоҳ, автобекат, ошхоналар, савдо расталари, таҳоратхона, кушхона барпо этилади.
Президент уларни сифатли қуриш, кўп сонли зиёратчиларга замонавий қулайликлар яратиш бўйича кўрсатмалар берди.
