8 февраль куни Finance TCI «Капиталбанк» устав фондидаги 3,85 фоиз акциялар эгасига айланди. Бу ҳақда Тошкент республика фонд биржаси маълумотларида келтирилган.
Маълумотларга кўра, Finance TCI Алишер Усмоновнинг USM холдингининг шўъба корхонаси бўлган «Телекоминвест» билан афилланган.
Россия компанияси биржа савдолари давомида қарийб 16,5 млн дона акциялар пакетини сотиб олди, бу банк устав фондининг 3,85 фоизини ташкил этади.
Айни пайтда банк устав капиталининг 61,54 фоизи ёки 263,89 млн дона акциялар ушбу афилланган компанияларга тегишли экани кўрсатилган. Улардан 12,18% Finance TCI улушига, яна 49,36 фоизи «Телекоминвест» ҳисобига тўғри келади.
Бундан олдин Finance TCI банкнинг устав фондидаги 8,33 фоиз акцияларни 108,45 млрд сўмга сотиб олганди.
2021 йилнинг октябрь ойида Ойбек Турсунов ўзида мавжуд бўлган 52,43 миллион дона акциядан ташқари «Капиталбанк»нинг 112,49 млн дона акциясини ҳам сотиб олганди ва банк афилланган шахслар рўйхатига кирганди. Ўшанда унинг улуши 50 фоизни ташкил этган бўлса, банкнинг «Телекоминвест» билан шартномадан сўнг у 41,6 фоизгача пасайган.
Биржада 2022 йилнинг 6 январидан 18 январига қадар «Капиталбанк» акциялар пакетлари билан 975,46 млрд сўмлик тўққизта битим (ҳар бир битимда — 32,98 млн дона ёки банк устав капиталининг 8,33 фоизи), шу жумладан, 10 январда «Телекоминвест» қўшимча 8,3 фоиз акцияларни харид қилгани қайд этилган. Натижада, ушбу компания акцияларнинг 25 фоизи эгасига айланди.
Аввалроқ, президентнинг тўнғич куёви Ойбек Турсунов «Капиталбанк»нинг афилланган шахслар рўйхатидан чиқарилган эди. Унинг ўрнига рўйхат «Телекоминвест» ва унга қарашли Корус (Россия) компанияси билан тўлдирилганди.
Афилланган шахслар — банк фаолиятига таъсир кўрсатишга қодир жисмоний ва юридик шахслар.
