Боёвут тумани ҳокими Дилфуза Уралова Олтинчи чақириқ Халқ депутатлари Боёвут тумани Кенгашининг ўттиз тўртинчи сессиясида ўзининг кенгаш раиси мақомини депутатларга топширди.

«Яна битта янгиликни айтмоқчиман. Аввалги селекторда муҳтарам президент билан суҳбат қилдик. Кеча бизга тавсиянома келди, Боёвут тумани халқ депутатлари кенгаши алоҳида қилинади. Ҳокимни алоҳида, кенгашни алоҳида қилиш бўйича Боёвут тумани билан Ширин шаҳрида тажриба ўтказилаяпти. 30 та депутат ичидан кенгаш раиси сайланади. У мени бошқарадида энди. Тушунаяпсизларми?», — деди у.

Ҳоким мазкур жараён бутун умрлик орзуси эканлигини таъкидлади.

«Мен масалан розиман. Қайтага бир умрлик орзуйим шу. Лекин, кенгаш раиси ҳокимдан кучли бўлиши керак. Ана шунда юриб кетади. Тўғри, инсон, ҳоким сифатида юзимизни қилиши мумкин, лекин бу ҳаёт учун кураш. Тўғри тушуниб, буни тўғри ҳал қиламиз деган мақсадда бутун республикадан эмас, Боёвутдан бошланаяпти. Шунинг учун депутатларни фаолликка чақириб қоламан», — деди Дилфуза Уралова.

«Мана муҳтарам президент ташрифи белгиланаяпти, — деди Боёвут ҳокими. — Эртага сизлар билан учрашади, ҳокимни алоҳида, кенгашни алоҳида қилиб бераман дейди, сизларни фаолликларингни назорат қилади энди. Эртага сенаторлар, доимий ишлайдиган депутатларга шароит қилиб берамиз, ойлик оласиз. Депутатлар Боёвутда фаол бўлгани учун ҳам айнан шу ердан бошлашаяпти».

Ҳокимнинг таъкидлашича, ҳозирда депутатларнинг ойлик маошини ҳал қилиш юзасидан тегишли ҳужжатлар ишлаб чиқилмоқда.

«Тўғри, бариқамиз, чақирамиз, (ўзаро муҳокамаларда тортишув назарда тутилмоқда — таҳр.) лекин, бу ривожланишимиз учун. Қуронбоев [Президентининг давлат хизмати ва ҳокимият вакиллик органлари билан ҳамкорлик қилиш масалалари бўйича маслаҳатчисининг биринчи ўринбосари Қаҳрамон Қуронбоев] бошчилигидаги гуруҳ келиб кетди», — деди ҳоким.

Эслатиб ўтамиз, «Газета.uz» ҳокимларнинг халқ депутатлари кенгаши раиси мақомини бекор қилишга оид материал эълон қилганди. Таҳририятнинг аниқлашича, 2019 йилги Давлат дастурига кўра, 6 ой ичида мазкур ҳужжат ишлаб чиқилган. Адлия вазирлиги ўшандаёқ лойиҳани ҳуқуқий экспертизадан ўтказиб, ижобий хулоса берган. Бироқ, ҳужжатнинг ундан кейинги тақдири номаълумлигича қолмоқда.

Қонунчилик палатаси маълум қилишича, «ҳужжат қуйи палатага келиб тушмаган, шу сабабли муҳокама қилинмаган». Сенат ҳам қуйи палатада кўриб чиқилмаган ҳужжат юқори палатага ҳам келиб тушмаслигини қайд этганди.

2021 йилнинг 18 июнь куни Ўзбекистон президенти Шавкат Мирзиёев Андижон вилояти фаоллари билан учрашувда ҳокимларни халқ сайлаши ва улар келгусида кенгаш раиси бўлмаслигини таъкидлаганди.

«Биз жойлардаги муаммоларни ҳал қилиш бўйича депутатлар, туман кенгашларига жуда катта ваколатлар берганмиз. Шундай тизимга ўтамизки, ҳар бир кенгаш раҳбари ҳоким бўлмайди. Кенгашга сайланган депутат унга раҳбар бўлади. Вилоят ҳокими ҳам вилоят кенгашининг раҳбари бўлмайди. Ижро органи раҳбари — туман, шаҳар кенгашларига ҳисобот берувчи. Бу тизимни онгимизга сингдирмаганимиз учун, одамлар ўргансин деб уни ушлаб турибман», — деганди у.

Давлат раҳбари ўшанда «халқ жойлардаги ҳокимият вакилларидан ҳисобот талаб қилса, вазият ўзгаради», дея қўшимча қилганди.

2021 йил 6 ноябрь куни Шавкат Мирзиёев инаугурация маросимида сўзлаган нутқида ҳам мазкур масалага тўхталиб ўтди.

«Неча марта биз буни гапирямиз, лекин мана, беш йил тажриба орттирдик… Энди кенгашнинг раҳбари ижро органи раҳбари бўлиши мумкин эмаслигини халқимизнинг ўзи айтяпти. Вақт-соати келди, қонуний масалани ҳам жой-жойига қўямиз. Шундай қилиб, демократик йўналишлардаги катта пойдеворни яратамиз. Агар шу пойдевор бўлса, анча анчагина ижро органи раҳбарлари ҳам халқ томонидан жиловланади. Халқ деганим — депутатлар томонидан, депутатлар деганим — халқ сайлаган вакиллар томонидан», — деганди у.