2022 йил бошига келиб Тошкент шаҳридаги жамоат транспорти йўловчиларининг деярли 50 фоизи нақдсиз йўлкира тарифларига ўтди, дея хабар берди ATTO автоматлаштирилган тўлов тизими оператори. 1 декабрдан бошлаб эса метро фақат карталар ёки бир марталик чипталарни қабул қила бошлади. Йўналишли таксиларда ҳам карталар қабул қилина бошланди.
Транспорт карталарига талаб ортиб бораётганига қарамай, баъзи фойдаланувчилар ўз балансларини тўлдиришда муаммоларга дуч келишмоқда. Тиғиз соатларда метро кассалари ва ATTO карталари сотиладиган киоскларда катта навбатлар юзага келмоқда. Шу муносабат билан балансни мустақил равишда тезда тўлдиришнинг турли усуллари мавжуд. «Газета.uz» навбатларда турмаслик ва вақтни тежаш учун нима қилиш мумкинлиги тўғрисида ҳикоя қилади.
ATTO картасини инфо-киоск орқали тўлдириш
Энг яқин инфо-киоск орқали транспорт картаси балансини тезда тўлдиришингиз мумкин. Инфокиосклар харитаси atto.uz сайти ва ATTO.Uz иловасида (PlayMarket ва AppStore, «Киосклар» бўлими) мавжуд.
Хизмат кўрсатиш тилини танлагандан сўнг, «Хизматлар учун тўлов» бўлимига ўтинг ва экрандаги операторлар рўйхатидан «ATTO картасини тўлдириш» бандини танланг.
Сўнгра олд томонда кўрсатилган транспорт картасининг рақамини киритинг.
Сўнг тўлов усулини танланг: нақд пул ёки UzCard. Кўпгина инфокиосклар фақат нақд пулни қабул қилади.
Нақд тўлаш. Сўровдан сўнг, пул қабул қилувчига керакли миқдордаги маблағни киритинг ва «Тўлаш» тугмасини босинг.
UzCard орқали тўлаш. Картангизни карта киритиладиган жойга жойлаштиринг ва PIN кодни киритинг. Ҳисобни тўлдириш миқдорини белгиланг ва «Тўлаш» тугмасини босинг. Тўловни амалга оширгандан сўнг, банк картангизни олишни унутманг.
Иккала ҳолатда ҳам пул ҳеч қандай комиссиясиз дарҳол ATTO картасига ўтказилади.
Click орқали ATTO картасини тўлдириш
«Тўлов» саҳифасини очинг ва операторлар рўйхатига ATTO ни киритинг.
ATTO белгисини босгандан сўнг, транспорт картасининг рақамини киритинг ва «Давом этиш» тугмасини босинг.
Сўнг экранда картага ўтказмоқчи бўлган маблағ миқдорини киритинг ва яна «Давом этиш» тугмасини босинг. Тўлов учун картани танланг ва «Тўлаш» тугмасини босинг.
ATTO картаси баланси бир зумда тўлдирилади, комиссия ҳисобга олинмайди. Бонус сифатида Click 1% кешбэкни сизга қайтаради: картани 10 минг сўм билан тўлдирсангиз, 100 сўм кешбэк сизга қайтади.
Apelsin орқали ATTO картасини тўлдириш
«Тўлов» саҳифасига ўтинг ва қидирув сатрига ATTO ни киритинг, сўнг оператор белгисини босинг. Транспорт картаси рақамини киритинг ва «Кейинги» тугмасини босинг.
ATTO картангизни тўлдирмоқчи бўлган маблағ миқдорини киритинг ва «Кейинги» тугмасини босинг.
Сўнг экранга тўлов учун банк картасини танланг, барча маълумотларни икки марта текширинг ва тасдиқлаш учун «Тўлаш» тугмасини босинг.
Қулайлик учун ATTO картаси рақамини иловада сақлаб қўйишингиз мумкин, шунда ҳар сафар ҳисобни тўлдиришда унинг рақамини киритишингизга ҳожат қолмайди. Бунинг учун «Менинг карталарим» бўлимига ўтинг ва «+» янги картани қўшиш белгисини босинг. Сўнг карта рақами ва амал қилиш муддатини киритинг ва «Давом этиш» тугмасини босинг.
Payme орқали ATTO картасини тўлдириш
«Тўлов» саҳифасига ўтинг ва қидирув сатрига ATTO ни киритинг, сўнг оператор белгисини босинг.
Кейин транспорт картаси рақами ҳамда тўлдирмоқчи бўлган маблағ миқдорини киритинг ва «Давом этиш» тугмасини босинг.
Сўнгра экранда тўлов учун банк картасини танланг, барча маълумотларни икки марта текширинг ва тасдиқлаш учун «Тўлаш» тугмасини босинг.
ATTO.Uz иловаси орқали транспорт картасини тўлдириш
ATTO.Uz иловасига бир вақтнинг ўзида бир нечта транспорт ва банк карталарини қўшишингиз мумкин. Мисол учун, бир жойдан туриб балансни кузатиш ва тўлдириш учун барча оила аъзоларининг ATTO карталарини битта иловага қўшишингиз мумкин бўлади.
Илова, шунингдек, карта йўқолганида уни блокировка қилиш имконини беради. Аммо балансни янги картага ўтказиш учун ATTO офисига мурожаат қилишингиз талаб этилади.
Транспорт картасини қўшиш. Илованинг асосий экранида «Транспорт картасини қўшиш» тугмасини босишингиз керак, сўнгра ATTO картасининг рақами ва амал қилиш муддатини киритасиз ва «Қўшиш» тугмасини босасиз.
Шундан сўнг SMS-хабарда юбориладиган тасдиқлаш кодини киритишингиз керак бўлади. Картани қўшганингиздан сўнг унинг балансини кузатишингиз ёки йўқолган бўлса, блоклашингиз мумкин бўлади.
SMS-хабарнома хизматини улаш. Кўпроқ хавфсизлик ва карта йўқолганидан кейин уни қайта тиклаш имкониятига эга бўлиш учун SMS-хабарнома хизматини улашингиз керак бўлади. Бунинг учун телефонингизда NFC модули ёқилган бўлиши керак: бу тизим аллақачон кўпчилик замонавий смартфонларга ўрнатилган.
Муҳим: ҳозирда NFC модули орқали SMS-хабарнома хизматини фақат Android смартфонларида улашингиз мумкин.
Хизматни фаоллаштириш учун NFC модули ёқилган телефонда иловадаги асосий меню белгисини босинг (сариқ рангдаги доира ичида) ва «SMS-хабарнома» бўлимини танланг ҳамда «Уланиш» тугмасини босинг. Картанинг рақами ва амал қилиш муддати автоматик равишда ўқиб чиқилганидан сўнг, «Кейинги» тугмасини босинг.
Сўнг мобил телефонингизга хабарда юборилган кодни киритинг ва «Тасдиқлаш» тугмасини босинг. Натижада, карта телефон рақамингизга уланади.
Банк картасини қўшиш нега керак? Иловада сўмдаги банк картангизни бириктиришингиз мумкин. Бунинг натижасида ҳар сафар ҳисобни тўлдиришдан олдин унинг рақамини киритишингизга ҳожат қолмайди. Бунинг учун дастурнинг асосий менюсидаги «Банк карталари» бўлимини танланг ва юқори ўнг бурчакдаги карта белгисини босинг (қизил рангдаги доира ичида). UzCard карта рақамини, унинг амал қилиш муддатини кўрсатинг ва «Қўшиш» тугмасини босинг.
Агар боғланган телефон рақами карта эгасининг рақамига тўғри келса, карта дарҳол иловага қўшилади. Акс ҳолда, SMS-хабар орқали юборилган тасдиқлаш кодини киритишингиз талаб этилади.
Балансни кузатиш ва тўлдириш. Жорий баланс илованинг асосий саҳифасида бириктирилган ATTO картасида кўринади. Уни тўлдириш учун яшил «Балансни тўлдириш» тугмасини босинг. Кейин, тўламоқчи бўлган банк картасини танланг, тўлдириш миқдорини киритинг ва «Тўлаш» тугмасини босинг.
Кейинги экранда тўлдириш миқдорини текширинг ва яна «Тўлаш» тугмасини босинг. Телефон рақамига тасдиқлаш коди билан SMS-хабар юборилади. Уни киритгандан сўнг, карта баланси дарҳол тўлдирилади.
ATTO картаси балансини қандай кўриш мумкин
ATTO транспорт картасининг жорий қолдиғини исталган тўлов иловасида (Click, Apelsin, Payme, Paynet ва бошқалар) ёки ATTO.Uz иловасида кўришингиз мумкин.
Тўлов иловалари орқали балансни кўриш. Тўлов саҳифасидан ATTO ни танланг ва транспорт карта рақамингизни киритинг. Сўнгра «тўлов тафсилотлари» пункти орқали жорий қолдиқни кўришингиз мумкин бўлади. Агар Apelsin иловасига ATTO картасини қўшсангиз, унинг баланси дарҳол «Менинг карталарим» бўлимида кўринади.
ATTO.Uz иловаси орқали балансни кўриш. Юқоридаги қўлланмага кўра, иловага ATTO картасини қўшинг. Ҳар бир ATTO картасининг қолдиғи илованинг асосий экранида кўрсатилади.
