Сенатининг 23 ялпи мажлисида сенаторлар томонидан «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун муҳокама қилинди. Бу ҳақда палата матбуот хизмати хабар берди.

Унда, сенаторлар «прописка» сўзини қонунчиликдан бутунлай чиқариш таклифи маъқуллади.

«Бугунги кунда „прописка“ сўзи маънан эскирганлиги ва ушбу атама фуқаролар онгида „тўсқинлик қилувчи“, „эркинликни чекловчи“ деган тушунчаларни келтириб чиқармоқда. Шу муносабат билан, қонун ҳужжатлардаги „доимий прописка қилиш“ ва „турган жойи бўйича ҳисобга олиш“ тушунчаларини „доимий яшаш жойи бўйича рўйхатга олиш“ ва „вақтинча турган жойи бўйича рўйхатга олиш“ тушунчаларига алмаштирилмоқда», — дейилади хабарда.

Шунингдек, Ўзбекистон президенти қарорига асосан хорижга чиқиш биометрик паспорти жорий қилингани сабабли қонунчиликка тегишли ўзгартиш ва қўшимчалар киритиш, бир қатор қонунларга биометрик паспортга оид ишлатилаётган тушунчалар келгусида идентификация ID-картаси билан қўлланилиши сабабли қонунга идентификация ID-картаси тушунчаси киритиш белгиланмоқда.

Эслатиб ўтамиз, 2020 йилнинг 1 апрелидан президент фармонига асосан Тошкент шаҳри ва вилоятида кўчмас мулкка эга бўлишда фуқародан доимий яшаш жойи бўйича рўйхатга олиш талаб этиш бекор қилинди, шунингдек, пойтахтда рўйхатдан ўтмасдан яшаш муддати 15 кунга узайтирилди.

Ўша йилнинг май ойидан бошлаб «доимий прописка» тушунчаси ўрнига «доимий яшаш жойи бўйича рўйхатга олиш» тушунчаси киритилган эди.