Ўзбекистонда коронавирусга қарши курашиш бўйича Махсус комиссия қарори билан Австралия, Австрия, Бельгия, Буюк Британия, Германия, Дания, Исроил, Италия, Нидерландия, Чехия ва Миср давлатлари ҳудудидан мамлакатга кириб келган йўловчиларни 10 кун давомида мажбурий уй карантини ёки уларни ўз ҳисобларидан меҳмонхонага карантинга жойлаштириш тартиби бекор қилинмоқда. Бу ҳақда ССВ матбуот хизмати хабар берди.
Ушбу тартиб коронавируснинг омикрон штамми кенг тарқалиши ортидан ўтган йилнинг декабрь ойидан бошлаб жорий қилинганди.
Бундан ташқари, Жанубий Африка Республикаси, Ботсвана, Намибия, Зимбабве, Мозамбик, Мадагаскар, Лесото, Эсватини, Танзания ва Гонконг билан халқаро авиақатновлар (кириш, чиқиш ва транзит рейслар орқали республика ҳудудига кириш) тикланади. Ушбу тартиб ҳам декабрь бошида киритилганди. Энди мазкур давлатларда сўнгги 14 кун давомида бўлган учинчи давлат фуқаролари ҳам Ўзбекистонга кира олади.
Аввалроқ, коронавирус юқтириб олган беморлар билан мулоқотда бўлган шахсларнинг карантин ўташ муддати 14 кундан 7 кунгача қисқартирилгани ҳақида ёзгандик. Бундан ташқари, 7 февралдан ОТМ, коллеж, лицей ва мактабларда таълим анъанавий шаклга ўтказилди.
