Ахборот ва оммавий коммуникациялар агентлиги 31 январь оқшомида «Кинотеатр» давлат телеканалида «Баунти» фильмининг очиқча саҳналари намойиш этилгани бўйича ўтказилган ўрганиш натижаларини эълон қилди.
Бунинг натижасида «Кинотеатр» телеканали эфирга тайёрлаш гуруҳи масъули А. А. билан тузилган меҳнат шартномаси бекор қилинди. Қолаверса, телеканал мутасадди раҳбари Н.Б.га «ҳайфсан» жазоси қўлланилди.
«Телеканал Бадиий кенгаши томонидан теледастурлар савияси экспертлар иштирокида атрофлича ва танқидий руҳда муҳокама қилинди. Келгусида бу каби ҳолатларга йўл қўймаслик юзасидан ташкилий, ижодий-техник чора-тадбирлар белгиланди», — дейилади хабарда.
«Баунти» — 1984 йилда Рожер Доналдсон томонидан суратга олинган денгиз саргузаштлари ҳақидаги фильм. Сюжет реал воқеалар ва Ричард Хьюгнинг «Капитан Блай ва жаноб Кристиан» романига асосланган. Бош ролларда Мел Гибсон, Энтони Хопкинс ва Эдвард Фокс ўйнаган.
Эслатиб ўтамиз, аввалроқ, Sevimli телеканалидаги «Сабрия» телесериалида эфирга кетган аҳлоқсизлик саҳналари кўпчиликниг эътирозларига сабаб бўлди. Бунинг ортидан АОКА ўрганиш оли борди ва натижада Sevimli телеканали бош директори ва бош муҳаррири ишдан бўшатилди.
