Ахборот ва оммавий коммуникациялар агентлиги 31 январь оқшомида «Кинотеатр» давлат телеканали томонидан намойиш этилган «Баунти» фильмининг очиқ-ойдин саҳналари ижтимоий тармоқларда муҳокама қилинганига муносабат билдирди.
«Ҳолат юзасидан президент администрацияси ҳузуридаги Ахборот ва оммавий коммуникациялар агентлиги томонидан дастлабки ўрганиш ишлари олиб борилмоқда. Ўрганиш ишлари Агентлик томонидан назоратга олиниб, экспертлар тайинланди», — дейилади хабарда.
Ўрганиш якунлари юзасидан тайёрланган хулоса асосида «Кинотеатр» телеканалига тақдимнома ҳамда Бош прокуратурага ҳуқуқий баҳо бериш учун маълумот киритилиши маълум қилинди.
«Баунти» — 1984 йилда Рожер Доналдсон томонидан суратга олинган денгиз саргузаштлари ҳақидаги фильм. Сюжет реал воқеалар ва Ричард Хюнинг «Капитан Блай ва жаноб Кристиан» романига асосланган. Бош ролларда Мел Гибсон, Энтони Хопкинс ва Эдвард Фокс ўйнаган.
Эслатиб ўтамиз, аввалроқ, Sevimli телеканалидаги «Сабрия» телесериалида эфирга кетган аҳлоқсизлик саҳналари кўпчиликниг эътирозларига сабаб бўлди. Бунинг ортидан АОКА ўрганиш оли борди ва натижада Sevimli телеканали бош директори ва бош муҳаррири ишдан бўшатилди.
