27 январь куни Тошкент шаҳрида 302 та тадбиркорлик субъекти ва 15 та бюджет ташкилотида коронавирусга қарши эмланиш ҳолати бўйича текширув ўтказилди. Бу ҳақда ССВга таяниб, ЎзА хабар бермоқда.

Текширувлар давомида 202 нафар ходим вакцина олмагани аниқланиб, вақтинчалик ишдан четлатилган.

Бундан ташқари, 196 та тадбиркорлик субъекти раҳбарига огоҳлантириш хатлари юборилиб, карантин қоидаларига риоя қилиш юзасидан кафолат хатлари олинган.

Аввалроқ, Соғлиқни сақлаш вазири ўринбосари Анвар Алимов 15 январдан ташкилотларнинг эмланмаган ишчилари масофавий ишлашга юборилишини маълум қилганди.

Қолаверса, Санитария-эпидемиологик осойишталик хизмати 2021 йилнинг 1 октябридан 2022 йил 18 январгача республика бўйича 56 мингдан кўпроқ бюджет ва хўжалик юритувчи ташкилотларда текширувлар ўтказгани ҳақида ёзгандик. Натижада эмланмаган 41 179 нафар ишчи-ходим вақтинча ишдан четлатилган, 4 139 та ҳолатда эса иш берувчи жаримага тортилган.