23 январь куни АҚШ Давлат департаменти АҚШнинг Киевдаги элчихонасида тўғридан-тўғри ёлланган ходимларга Украинани ихтиёрий равишда тарк этишга рухсат берди ва ходимларнинг оила аъзоларига мамлакатни тарк этиш бўйича кўрсатма берди. Бу ҳақда Давлат департаментининг Консуллик масалалари бюроси хабарида айтилди.

Ходимларнинг ихтиёрий равишда кетишига «Россия ҳарбий ҳаракати таҳдиди сақланиб қолаётганлиги сабабли рухсат берилган», дейилади хабарда.

Украинада қолаётган АҚШ фуқаролари тижорий ёки бошқа транспорт воситаларидан фойдаланган ҳолда мамлакатни тарк этиш ҳақида ўйлашлари керак, дея тавсия қилди бюро.

«Россия Украинага қарши жиддий ҳарбий ҳаракатлар режалаштираётгани ҳақида хабарлар бор. Хавфсизлик шароитлари, айниқса Украина чегаралари, Россия томонидан босиб олинган Қрим ва Россия назорати остидаги Украина шарқида вазиятни олдиндан айтиб бўлмайди ва кескин ёмонлашиши мумкин. Бутун Украина бўйлаб, жумладан Киевда ҳам баъзида зўравонликка айланиб кетадиган намойишлар мунтазам бўлмоқда», — дейилади баёнотда.

Департамент Россиянинг ҳарбий ҳаракатлари ва COVID-19 таҳдидининг кучайиши сабабли Украинага саёҳат қилишни тавсия қилмаслигини маълум қилди.

Буюк Британия АҚШдан кейин Киевдаги элчихонаси ходимларини чақириб олишни бошлади, дея хабар берди BBC. Тегишли қарор «Россия босқинининг эҳтимоли» ҳақидаги хабарлар фонида қабул қилинди.

Шу билан бирга, расмийлар британиялик дипломатларга нисбатан аниқ таҳдидлар йўқлигини, бироқ Киевда ишлаётган ходимларнинг ярмига яқини Буюк Британияга қайтишини айтди.

Украина Ташқи ишлар вазирлигининг муносабати

Украина Ташқи ишлар вазирлиги АҚШнинг Украинадаги элчихонаси ходимларининг эвакуация қилинишини эрта, деб ҳисоблайди. Бу ҳақда ТИВ вакили Олег Николенко УНИАН мухбирига маълум қилди.

«Ташқи ишлар вазирлиги АҚШ Давлат департаментининг Киевдаги ушбу давлат элчихонаси ходимларининг оила аъзоларини тарк этиши, шунингдек, айрим ходимларга ихтиёрий равишда кетиш имкониятини тақдим этиш ҳақидаги қарорини эътиборга олди», — дейди Олег Николенко.

Шу билан бирга, «хорижий давлатларнинг ўз дипломатик ваколатхоналари хавфсизлигини таъминлаш ҳуқуқини ҳурмат қилган ҳолда, биз Америка томонининг бундай қадамини эрта ва ҳаддан ташқари эҳтиёткорликнинг намойиш қилиниши деб биламиз», — дея таъкидлади спикер.

«Аслида, ўтган вақт ичида вазият ва хавфсизлик соҳасида туб ўзгаришлар кузатилмади: Россия агрессиясининг янги тўлқинлари таҳдиди 2014 йилдан бери ўзгаришсиз қолмоқда ва Россия қўшинларининг чегара яқинида тўпланиши ўтган йилнинг апрель ойида бошланган», — деди Олег Николенко.

Унинг қўшимча қилишича, АҚШ Давлат департаментининг қарори АҚШ элчихонасининг барча ходимлари энди Украинани тарк этишини билдирмайди. Спикернинг сўзларига кўра, элчихона ўз фаолиятини тўлиқ давом эттиради. «Дипломатик миссия аъзолари шундай истак бўлса, кетиш имкониятига эга бўлди. Бироқ уларнинг кетиши умуман мажбурий эмас», — деди у.