Ўзбекистон Марказий банки томонидан «Газпромбанк» АЖнинг (Россия) ваколатхонаси аккредитация қилинди, дея хабар берди регулятор матбуот хизмати.
Хабарга кўра, ваколатхона Ўзбекистоннинг давлат органлари, молия-кредит ташкилотлари, таълим муассасалари ва хўжалик юритувчи субъектлари билан алоқаларни ўрнатиш, уларни қўллаб-қувватлаш ва ривожлантириш, банкнинг Ўзбекистонда халқаро бизнесини ривожлантиришга кўмаклашиш, шунингдек, банк томонидан Ўзбекистонда амалга оширилаётган ташаббус ва лойиҳаларни қўллаб-қувватлаш мақсадида ташкил этилди.
2018 йилнинг январь ойида Шавкат Мирзиёев «Ўзбекнефтгаз» раҳбариятига корхонанинг кредит рейтингини олиш ва ташқи бозорга чиқиш учун ишларни жадаллаштириш бўйича топшириқ берган эди. Шу билан бирга, компания «Газпромбанк»ни халқаро капитал бозорларида «Ўзбекнефтгаз» АЖ еврооблигацияларининг дебют эмиссиясининг икки глобал координатори ва муаллифларидан бири этиб тайинлаш бўйича мандат келишувини имзолаганини маълум қилди.
Шунингдек, 2021 йилнинг 4 июнь куни Jizzakh Petroleum «Газпромбанк» билан янги газ-кимё мажмуасини молиялаштириш бўйича ўзаро англашув меморандумини имзолаган эди.
Бундан ташқари ушбу банк Ўзбекистоннинг газ-транспорт тизимини модернизация қилишда ҳамкорлик қилувчи ташкилот ҳисобланади. Ушбу лойиҳага 618 млн долларгача кредит ажратилиши мумкинлиги айтилган эди.
Эслатиб ўтамиз, Газпромбанк Қашқадарё вилоятида синтетик суюқ ёқилғи ишлаб чиқариш бўйича Uzbekistan GTL заводининг молиялаштирилишида ҳам иштирок этган.
