Тошкентда машинага ўқ узилган ҳолат иштирокчиларига 15 суткалик қамоқ жазоси берилди. Бу ҳақда UzReport TV телеканали хабар берди.
Аввалроқ, «Газета.uz» 20 январь куни Тошкентнинг Мирзо Улуғбек кўчасида Spark ҳайдовчиси йўл ўртасида машинадан тушиб, «ВАЗ-2199» русумли автомашинанинг ғилдирагини тепиб, сўнг тўппончадан машинага қарата ўқ узгани ҳақида хабар берган эди.
Ўша куни кечқурун Тошкент шаҳар ИИББ можаро танишлар, 32 ёшли З.С. (пневматик тўппончадан ўқ узган) ва 37 ёшли Г. А. ўртасида бўлиб ўтганини маълум қилди. Экспертиза натижаларига кўра, ўқ отилган восита спорт пневматик қуроли эканлиги маълум бўлди. Қонунга кўра, у фақат спорт майдончасида қўлланиши белгиланган.
21 январь куни Жиноят ишлари бўйича Мизо Улуғбек туман судида ўтган суд жараёнида иккала шахс ҳам айбига иқрор бўлган ва айбидан пушаймонлигини айтган.
Суд иккала фуқарони ҳам Маъмурий жавобгарлик тўғрисидаги кодекснинг 183-моддаси (Майда безорилик)да назарда тутилган қонунбузарликни содир этгани учун 15 суткага маъмурий қамоқ жазосини тайинлади.
