Республика бюджет ташкилотлари ва тадбиркорлик субъектларида ишчи-ходимларнинг коронавирусга қарши эмланиши бўйича 2021 йил 1 октябридан 2022 йил 18 январгача 56 406 та текширувлар ўтказилган. Бу ҳақда «Газета.uz»га Санитария-эпидемиологик осойишталик ва жамоат саломатлиги хизмати хабар берди.
Текширувлар 17 869 та хўжалик юритувчи субъект ҳамда 38 537 та бюджет ташкилотида ўтказилган. Натижада жами 80 546 нафар вакцина олмаган шахслар аниқланган.
Уларнинг 20 125 нафари хўжалик юритувчи субъектлари, 60 421 нафари эса бюджет ташкилотларида фаолият юритиши маълум бўлган.
Вакцина олмаганлик вазияти бўйича:
- 41 179 нафар шахслар ишдан вақтинчалик четлатилган,
- 4 139 та ҳолатда иш берувчига нисбатан жарима чораси,
- ҳодимларга нисбатан жарима қўлланмаган,
- 237 та объектга нисбатан эса фаолиятини вақтинчалик муддатга тўхтатиш чораси қўлланилган.
Санитария-эпидемиологик осойишталик хизматининг «Газета.uz»га аниқлик киритишича, текширувлар давомида фуқароларга Маъмурий жавобгарлик тўғрисидаги кодекснинг 54-моддаси 2-қисмига асосан чоралар кўриб келинмоқда. Унга кўра, жисмоний шахсларга БҲМнинг 20 баравари (5,4 млн сўм), мансабдор шахсларга эса — 30 баравари (8,1 млн сўм) миқдорида жарима қўлланилган. СЭС матбуот хизмати қўшимча қилишича, ҳозирга қадар ходимларга нисбатан жарима жазо чораси қўлланилмаган.
Эслатиб ўтамиз, 17 январь куни Тошкент шаҳридаги 508 та бюджет ташкилоти ва тадбиркорлик субъектларида текширувлар ўтказилганди. Унда коронавирусга қарши эмланмаган 1044 нафар ходим вақтинча ишдан четлатилгани, 200 нафари эса жаримага тортилгани маълум қилинган эди.
